Thingsulthliah leh Ramhlun South in Semifinal an lut

23rd March 2017, 10:03PM

March ni 23, Ningani khan NECS Cup 2017 Inter Village Football Tournament Quarter final group A an match hnuhnungber khelh a ni a, Thingsulthliah chuan 5-1 a Ramhlun North hnehin semifinal an lut a, Ramhlun South chuan 2-1 a Armed Veng South hneh ve bawkin semifinal an lut ve bawk.

March ni 24, Zirtawpah Group B ten an match hnuhnungber an khel ve thung ang a,  chawhma dar 11:00 Am-ah Sihphir Venghlun leh Bawngkawn ten an khel ang a, Chawhnu dar 1:00 PM-ah Chhinga Veng leh Electric Veng ten an khel thung ang. Electric Veng tih loh chuan Semifinal lut theihna chance an nei vek a ni.

Inkhel hmasa zawk Sihphir Venghlun tan tute hi K.Kawla stand-ah thut tur a ni a, Bawngkawn tan tute hi Zomuanthanga stand-ah thut tur a ni. Inkhel hnuhnung zawk Chhinga Veng tan tute hi K.Kawla stand-ah thut tur a ni a, Electric Veng tan tute hi Zomuanthanga stand-ah thu tur a ni.

11:00 AM Ramhlun North 1-5 Thingsulthliah

KT Vanlalhruaia 19', Joel Lalmuanpuia 23', 73', 79', KT Vanlalhruaia 58') (Robert Lalruatdika 48')

Inkhel hmasa zawkah Thingsulthliah chuan 5-1 in Ramhlun North an sawp a, he inkhelah hian Joel Lalmuanpuia Thingsulthliah chu Man of the match-ah thlan a ni.

Inkhel tan a ni a, Thingsulthliah chuan inkhel thu nun zawkin minute 19-ah Joel Lalmuanpuia ball cross tha zet chu box chhung a awm KT vanlalhruaia chuan tauh lutin, an hmahruaina goal a khung a, minute 4 aral leh hmain Lalfelpuia ball vawrh  tha zet chu Lalmuanpuia chuanThingsulthliah tan an goal hnihna a khung leh a, goal dang luh belh lo in, Thingsulthliah chuan 2-0 a hmahruaiin chawlh lawk an hmang ta a ni.

Second half tan a tang a minute 3 aral hmain Ramhlun North tan Robert Lalruatdika chuan an goal khatna khung ve bawk mahse, minute 10 aral leh hmain Thingsulthliah tan KT Vanlalhruaia chuan an goal thumna a khung ve leh a, Minute 73-ah Thingsulthliah tan bawk KT Vanlalhruaia thawh rah sengin Joel Lalmuanpuia bawk chuan an goal li na khung leh in, minute 6 aral leh hmain Joel Lalmuanpuia bawk chuan hattrick siamna goal a khung a,  Thingsulthliah chuan 5-1 in hnehna an chang ta a ni.

Thingsulthliah hian quarter final an match hmasa berah 2-2 a Ramhlun South an draw hnuah Armed Veng South 1-1 in an draw leh a, vawiin an match hnuhnung berah Ramhlun North 5-1 a hnehin semifinal an lut ta a ni.

01:00 PM Armed Veng South 1-2 Ramhlun South

(Lalhruaizela 37') (Lalremruata 42', Lalrohlua Sailo 63')

Inkhel hnuhnungah Ramhlun South chuan 2-1 in Armed Veng South an hneh. Ramhlun South tan Lalhruaizela leh Lalrohlua Sailo chuan goal khat ve ve an khung a, Armed Veng South tan Lalhruaizela chuan goal khat a khung ve bawk. He inkhelah hian Hmingthantluanga Ramhlun South chu Man of the match-ah thlan a ni.

Inkhel tan a ni a, Armed Veng South chuan inkhel thu nun zawkin, goal thunna hun tha nei nual mahse goal an thun mai thei lo. Ramhlun South pawhin goal thunna hun tha nei thin mahse, goal an thun mai thei bik lo. Minute 37-ah Armed Veng South chuan an chance neih hmang tangkai hmasa zawkin defender Lalhruaizela chuan yard 27 vel atangin mawi takin goal hmahruai a khung a, minute 5 aral leh hmain Ramhlun South tan forward Lalremruata chuan an siphurh a rul  thung. Goal dang luh belh lo in, 1-1 in chawlh lawk an hmag.

Second half-ah Ramhlun South tan minute 63-ah Lalremruata ball cross tha zet chu midfielder Lalrohlua chuan box-ah la lutin an goal hnihna a khung a, Armed Veng South chuan an siphurh sut tumin counter attack in nawr mahse, goal an thun thei lo, hun tawp thlengin goal a luh belh tawh lo a, Ramhlun South chuan 2-1 in hnehna an chang ta a ni.

Quarter final-ah Ramhlun South hian 2-2 a Thingsulthliah an draw hnuah Ramhlun North 5-1 in an hneh a, vawiin an match hnuhnung berah Armed Veng South 2-1 a hneh leh in semifinal an in pet tling ta a ni.

March ni 24, Zirtawpni Fixtures:-

11:00 AM Sihphir Venghlun vs Bawngkawn

01:00 PM Chhinga Veng vs Electric Veng

(adsbygoogle = window.adsbygoogle || []).push({});

Copyright © inkhel.com 2024. All rights reserved.