​The Girl Next Door : Ganguly leh Dona te hmangaihna lamtluang

09th September 2018, 04:09AM

Mihring maktaduai tam tak chenna, Calcutta khawpui chu thian inkawm ngeih tak pahnih - Ganguly leh Roy-a te tan chuan kawtthler te reuh te ang lek a ni. A chhan chu chu hmuna kawi tinte chu an hre chiang em em vek a, sumdawnna lama an hlawhtlinnate chuan a khawpui chu a hmuh tettir zo ta a ni ber.

Thian inkawm ngeih tak an ni a, sumdawng dun an ni bawk. Calcutta-a hmun lar leh lun tak Behala an tihah chuan inhmun intawm tur leiin chutah chuan in an sa a; inthenawm chu an duh dan a ni.

Mahse, hun a kal a, mimal thila innghirnghona neuh neuh chuan thian dun inkawm ngeih tak chu a then ta a; hmelma an lo ni ta! An in inkarah chuan daidanna bang sangpui mai an din ta rup mai a; tihpalh thil thua inmelh fuh palh pawh an duh tawh lo!

THAWNTHU THAR CHU

Hun a kal zel a, Ganguly leh Roy chhungkua chu an hmuingil chho zel a... Karah fanaute hial an rawn piang ta a. Ganguly leh Roy chhungkuate inremna tur nau a piang dawn a ni tih reng an ngaihtuah phak lo.

Lehkha thiam thei tak mai, Sourav Ganguly chuan a pa sumdawnna vawn nun ai chuan sports khelh a thlang tlat mai a. Tlai tin deuh thaw football khelin a chhuak thin a ni. Inthenawm ta chu, an thenawm tleirawl hmeltha zet mai Dona Roy chu a 'star' rilru thin hle a. Hmeichhe dang reng a ngaihtuah thei lo.

A hnua talk show-a an kawmnaah Sourav chuan heti hian a sawi: "Football khel tura chhuah kha ka phur thei hle; a chhan chu ani (Dona) kha ka hmu fo thin a ni. Vawi duai lo ka hmu thin a ni," tiin. Ani, Dona-i pawh chuan a lo hmel duh ve hle ni tur a ni, a hnua an kawmnaah heti hian a sawi ve bawk: "An in kawta badminton an khelh changa, an shuttle cock kan compound a a lo tlak luh khan ka phur thei hle a. A chhan chu amah (Sourav) hmuhna hun tha ka neih phah vang a ni," tiin.

ZINKAWNG CHU A THUI DAWN SI A

Calcutta khawpuiin, 'DadaGiri' tia inti tatu taka a koh, 'Bengal Lal Fapa' ti hiala a hming an vuah, Sourav Ganguly hi football ngaina tak a ni. Chutih laiin a unaupa khelh thin Cricket chu kum 20 a tling thuak tawh tihin tihtak zetin a khel ve ta a, hun rei lo te-ah India captain ropui takah a chhuak nghal der a ni.

Football a khelh lai leh Cricket a khelh tan hnu hian Dona chuan a inkhel chu chhungte hriat lohvin a en ru thin a. Chutiang bawkin Sourav-a chuan a 'thian ni tawh chiah lo' classical dancer Dona-i lam lai chu a hmunah kalin a en ru ve thin a ni. Chhungkaw intlawh pawh ngai lo leh inhmelmak an nih avangin Sourav leh Dona te pawh chu an inkawm duh a nih chuan a ruk thei ang bera an inhmuh a ngai thin.

Chhuanlam siamin bazar lun ber berah te an leng dun thin a; an hmelhriat an awm lo a ni tih an chian hnuah chauh an kut an invawnsak thin a ni. An inngai em em a, mahse hmangaihna lam thu erawh a sawi hmasatu nih an ngam lo ve ve thung.

Tum khat chu mumal taka in-date ve an rilruk ta a. Kolkata-a Chinese restaurant pakhat 'Mandarin' an tihah chuan an chawl dun ta a. Fried Rice, Chilly chicken, Chowmein, American Chopsey tih vel an han order a. Hmangaihna lam thu an sawi dun ve ta!!! A hnua 'Telegraph' in an kawmnaah Dona-i chuan, "Engkim mai kha amah khan a ei deuh vekin ka hria," tiin fiamthuin a sawi.

CHUN LEH ZUA HRANG MAHSE...

Kum 1996 a ni a, England rama test match khela zin tur India Cricket Team-ah chuan Sourav Ganguly a tel ve ran mai. Mual hmingthang tak Lord's-ah chuan hmel thar a langsar nghal a, naupang ena an en kum 20 chuang awrh Ganguly chuan run 131 a vaw chhuak der mai! Chutah match lehah century a siam chhunzawm leh nghal a, India chanchinbu leh TV te chuan, "Calcutta naupang hi tunge a nih?" "Naupang Rangkachak A Piang!" tihte headlines-ah an hmang ta chur chur mai le... Chu chu Sourav-a tan chuan mumang ram ang mai a ni.

Chu'ng thute chu Ganguly chhungkaw tan chuan thu lawmawm tak ni mah se, Sanjeev Roy leh a chhungkaw tan erawh thu hriat nuam a ni hauh lo. A fanu Dona-i nen an inkawp a ni, tih hriat erawh chu aia ngaihthlak nuam lo lehzual tur a ni.

India team an rawn haw hnu chuan Sourav chuan a thian tha tak, Banerjee chu biain, "Dona hi neih ka duh a ni. Mahse, a rukin... Tun hun hi ka tan chuan hun tha tak a ni," a han ti a. Rem an ruat tan ta!!!

Registrar office-ah chuan thian tha bik chauhte kal khawm ila, chutah chuan a rukin kut kan insuih dawn nia, tih chu an remruatna a ni. A hun a lo thlen chuan a hrangin Sourav leh Dona te chu an thiante ve ve nen office lam pan chuan an kal ta a... Mahse, a hmun an thlen chuan beisei miah loh mihring an lo awm ta nuai mai a. A ranga rangin plan chu thlak a ngai ta!

'Tichuan Banerjee-a te in lam panin an tlan nghal a, registrar pawh chuan a zui ve nghal a. A thianpate inah chuan khawvel hriat hauh lohvin a hmangaih em em Dona-i kut chu van lam hriatpuinain a vuan ve ta a ni. Chu an inhmangaihna chuan tuarna leh tahna kawng a zawh dawn tih an hria a, an sen tet atanga hmangaihna famkima enkawltu an nu leh pate mittui a luantir dawn tih pawh an hai bik lo. Mahse, anmahni anmahnia siamtu chu an inhmangaihna chauh chu a nih miau avangin chu harsatna chu hmui pet fan dawr dawra tawn tlang chu an thlang ta zawk a ni.

Mi thenkhatten hlim taka lawi that zan an hman laiin, nupui leh pasal ni hlim, Sourav leh Dona Ganguly te erawh chuan mahni in an pan ve ve a, thinlunga innei tawnin lawi that zan chu single khumah an hmang ta thung a ni.

NU LEH PA BENG A THLENG TA!

Eizawnna atana thuruk hai chhuak thin chanchibumite chuan hun rei lo teah chu an thuruk chu an rawn hai chhuak ta! Ganguly leh Roy chhungkua chu thinurna meipuiin a bual a, hmeichhia an tap a, patling an rum nghalh nghalh mai! Engkim chu tihfel a ni tawh si a, kawng dang thlan tur a awm ta lo.

'Tichuan, February ni 21, 1997 a lo thlen chuan chhia leh tha hriat hma hauha lo inhmangaih ru tawh Sourav Ganguly leh Dona Roy te chu hnam hming intawm a, double bedsheet delh dun kumkhua turin, Nu leh Pate hriatpuiin an innei tha leh ta a ni.

Vawiin thleng hian nupa hlim tak an la ni reng a, intih nat changte han awm thin bawk mahse an inkara hmangaihna chuan a suih zawm reng avangin chu hmangaihna thianghlim chu an inkar leh an chhungkaw inkarah remna lentirtu a ni ta zel a ni.

-Dustin Lalkulhpuia, LPS Sports

Copyright © inkhel.com 2024. All rights reserved.