TFL khelh mek chu League match hnuhnungberah ATA Electric Veng Fighter ten Republic Vengthlang hnehin Semifinal an lut a, Ramhlun Sporting Club in Dinthar Fighter hnehin Semifinal an lut bawk.
Group A atangin Kolasib Fighter leh Group B atangin CMTC Hlimen Roller ten Semifinal an lut tawh bawk. Semifinal hi December ni 5, (Thawhtan) zan dar 8 ah Electric Veng YMA hall-ah khelh a ni dawn a. Khual khuaa zamna nei miah lo Kolasib Fighter leh player nei hrawl CMTC Hlimen Roller te an innuai hmasa ang.
Electric Veng YMA Hall-a inbeihna hautak leh hmuhnawm Taekwondo Fight League-ah hian kar kalta inrinni zan khan Electric Veng leh Republic Vengthlang-te an inchil pawp pawp a ni ber mai a, boruak sang leh tang tak nen bul an tan.
(adsbygoogle = window.adsbygoogle || []).push({}); Round khatnaah hian ATA Electric Veng chan a tha a, 18-14 in hma an hruai. An playmaker leh fighter of the night dawngtu ni zui ta Alan Lalruatfela chu mite beisei lawk ang ngeiin a che pui leh hle a. A team tan scorer anih bakah thiante a chawkphur thiam hle a, Fight of the Night dawng tlakin a khel.
Round hnihnaah Republic Vengthlang Coach Puitea'n game plan a sawi danglam hret a, awmzia a nei hle. Lalthlamuanpuia'n inbeihna a thunun zui ta tlat a, Republic Vengthlang fans auna tur hun a siam sak hnem hle. ATA lam hi bet deuh mahse a rul tawkin an lo chhanglet ve zel a, Republic Vengthlang in 15-14 in round an la ta a ni.
Round thumna boruak a sang ta hle a, Republic Vengthlang an tal na khawp mai. Lut hmasa C.Lalfakzuala'n a zir bawka game an awp hneh hle a, mahse Electric veng lamin Zorampana leh Albert-a chet that zarah counter attack hmuhnawm tak an lo khel ve tlat thin a. Duh tawkin che lo mahse Republic Vengthlang hian 9-7 in round an la leh ta a ni. Round hnih la zawn mahse bul an tan chhiat an tuar a, belhkhawmah 39-38 in ATA Electric Veng an chak ta hram a, ui tak, lu dawm vawng vawngin Republic Vengthlangin TFL an mang\ha ta a ni.
Inbeih pahnihnaah Power house Ramhlun Sporting Club chuan Dinthar Fighter an hneh ve thung a, an insiamtha tih a chiang e.
Dinthar hi chak hlim hlawl an nih avangin an inring tawk viau a, RSC erawh match hmasaa tlawm an nih avangin tlawm nawn tawh loh an tum zia an pholang thung.
Ruakhau zet mai, feet 6 val pahnih Johny Vanlalruatsanga leh C.Vanlalhuma te in hmachhawn chu a hmuhnawm tham a tling a, RSC in offensive game a khelh laiin Mahuma leh Dinthar lam hian Counter attacker game an khel thung.
RSC Coach Hlimpuia'n team innghahna Johny leh Ramdinthara te a hmang rimin an che tha hle a. Chutih laiin Dinthar fighter Vanlalfela a tal na hle bawk. Fela hian chawlh awm miah lova a tumpui awmah tak vawi 10 chuang a pet tlir mai chu Dinthar tan lotu te pawh hahipa sawi zui tlak a ni ngei ang.
Round khatnaah RSC in 11-5 in hnehna an chang a, Round hnihna pawh tha thlah lovin an la zui a, 12-7 an chak leh phawt. Round thumnaah Dinthar an indinthar a, an fight back pui tak chuan 15-12 in round laktir mahse semifinal lut tur khawpin an indinthar zo ta lova, Ramhlun Sporting Club-in belhkhawmah 38-24 in hnehna an chang ta a ni.
League match hnuhnung ber zanah hian sports changtu Pu Hmingdailova Khiangte, Parliamentary Secretary chu khual lian a ni a, TFL Dance Battle hmuhnawm tak Guardians in an entir bawk.
Tha za rual leh tuanrang awmkhawm ATA Electric Veng Fighter leh tharum hlawm Ramhlun Sporting Club inhmachhawn tur a hmuhnawm zawk ang em? TFL Dance Competition finalist Blue Orb leh Jumpin’Dolls ten champion tumin an inel bawk ang.
(adsbygoogle = window.adsbygoogle || []).push({});