​Tennis: Miami Open Final-ah Federer vs Nadal kan hmu dawn

01st April 2017, 09:04PM

Federer-a'n kuminah game 19 khel tawhin game 18-ah hnehna a chang thei a ni. Kum 35 a ni tawh tih hre reng ila.

Roger Federer leh Rafael Nadal-te chu Miami Open final-ah an inhmachhawn leh dawn a, he hmunah hian kum 2004 khan player pahnih hi a vawikhatna atan an inhmachhawn a nih kha. Federer hian Final lut turin Australian rawlthar Nick Kyrgios 7-6 (11-9) 6-7 (9-11) 7-6 (7-5) in a hneh hram a, darkar thum leh minute 10 lai an khel a ni.

2006 Miami Open champion Federer chuan, "A nuam dangdai khawp mai. Tie breakers vawi thum hi chu a thleng zen zen lo a, hnehna ka chan theih avangin ka lawm hle. Theihtawp chhuah ka tum a, nimahsela ka duh angin takin ka khel reng thei bik lo. Hetianga hnehna chan hi a ropui a ni," tiin amah aia kum 14 zeta naupang Kyrgios chu khelh a awlsam lo tih a sawi.

Federer leh Nadal-te pahnih an reh dun vang vang hnuah Australian Open-ah final-ah an inhmachhawn a, Federer-a'n hnehna changin Grand Slam title 18-na a hlawhchhuak. Federer a khel tha tluang a, Indian Wells Open-ah champion zui leh nghalin Pathianni-a final khelh tur Miami Open-ah hian Nadal a hneh thei a nih chuan tournament a khelh hnuhnung pathumah a champion vek dawn tihna a ni. Nadal tan pawh phuba lakna hun tha ni dawn a, Federer laka chungnung zawk nih a tum ngei ang.

Copyright © inkhel.com 2024. All rights reserved.