07 Aug 2018 02:19

inkhel

​Stones midfield-ah?

Manchester City chuanCommunity Shield-a Chelsea an hmachhawn tumin hun tawp lamah manager Pep Guardiola chuan Vincent Kompany a dahluh avangin defender John Stones chu defensive midfield-ah a khelhtir a, khel rei lo mahse kum 24 mi hi a buai lo hle tih a lang.

World Cup khelh zawh takah England chuan semi-final an thlenga Stones hi an player pawimawh a ni. England coach Gareth Southgate chuan defence pathum a hman avangin defence pathum (back 3) zinga a laiah Stones hi a dah.

Back 3 hman a nih hian a lai tak ami hi ‘sweeper’ / ‘libero’ ang deuhin an khel a, passing tha leh ball thiam tel deuh a ngai a, hemi a nih avang hian centre-back nazawng tan a khelh theihlohna chen a awm.

Chelsea-in Antonio Conte hnuaia Premier League an lak tum pawh khan back 3 an hmanga, a lai takah David Luiz hman a ni a, langsar si lova Chelsea innghahna ber pakhat a ni. Luiz hi a passing a thaa, ball a keng thei a, Jose Mourinho hnuaiah defensive midfield-ah a lo khel fo tawh reng a ni.

Tunlai back 3-a a laia khelte hi sweeper ang deuhva an khelh avang hian German player ropui Franz Beckenbauer leh Italian sweeper ropui Armando Picchi-te ang chu an nilo tih hriat tel a thaa, kan hriatthiam theih nan kan player ropui pahnih sawi tak leh tunlai cente-back pangai-te inkar ang hi an ni a th theih awm e.

England tan pawh Stones chuan back 3 laiah a khel a, a passing a chhe lo hle a, rin ai tak pawhin ball a keng thei a nih kha. Community Shield-a Chelsea an hmachhawn tum pawhin Sergio Aguero-a goal hnihna kha Stones atanga chhuak hi a ni nghe nghe.

City hian centre-back rinrawla hman theih pali an nei a, Stones bakah hian Laporte, Kompany leh Otamendi-te an neia, anni pali hian season tharah starting-eleven an inchuh dawn.

Defensive midfield-ah City hi an pan angrenga, manager Pep Guardiola pawhin Fernandinho thlaktu tur mumal an neih loh thu leh defensive midfielder dang an la mamawh thu a sawi tawh bawk.

Guardiola chuan Premier League-ah chuan game a tam a, a hautak avangin player zawng zawngte chu a mamawh vek dawn thu a sawi a, Stones pawh hi Chelsea lakah a khelhchhiat lem loh avangin defensive midfield-ah a hmang maithei tih thu a sawi nghe nghe a ni.