World no. 1 Novak Djokovic chuan tennis hian big five a nei tawh a chung zingah chuan Stan Wawrinka hi a tel ve a ni tih a sawi. Wawrinka hian US Open khelh zawh takah khan final-ah Djokovic hnehin a champion.

US Open 2016 runner-up Djokovic chuan, "Big match-ah tha tak takin a khel a chuvang chuan player thazual bik ho zinga tel hi a phu a ni" a ti. World no. 3 Stan Wawrinka erawh chuan, Big four Djokovic, Andy Murray, Roger Federer leh Rafael Nadal te zinga tel chu ala hlat thu a sawi ve thung.

Final vawi 11 chak tawh Wawrinka chuan Big four-te chu, "Kum engzat nge an khelh tawh a, inelna engzat nge an chak tawh en rawh u. In en a nih chuan in hria ang, kei chuan Grand Slam pawh 3 chauh ka la la a. Murray hian Master 1000 engzat nge a khelh tawh? Kum 10 lai a khel tawh. An champion kher lo a nih pawhin final emaw semi-final emaw an thleng ngei ngei thin, chuvang chuan an huangah hian ka tel lo a ni" tiin a sawi.

Wawrinka hi Ken Rosewall kum 35 ni chunga 1970 US Open champion hnung rawn zuiin Kum 31 ni chungin a champion a. Heti hian kum 30 hnu lama tournament liantham champion thei panga zingah Wawrinka hi a tel a. Grand slam champion kim turin Wimbledon chiah a mamawh ta a ni.