​Spurs hnehin United-in FA Cup final an lut

22nd April 2018, 05:04AM

Tottenham stadium hman lai Wembley Stadium-ah Manchester United chuan 2-1 in Tottenham an hneh a, FA Cup final a vawi 28 nan an lut ta a, Tottenham erawh FA Cup semi final-ah a zawnin vawi 8 lai an tlawm ta a ni.

Tottenham chuan Dele Alli goal hmangin 11 mins-ah hma an hruai, he goal hi minute 30 an khelh tlin hma hretin Sanchez chuan a rul a, second half 62 mins-ah Herrera chuan United chakna goal a khung ta a ni.

Manchester United 2-1 Tottenham

(Sanchez 24', Herrera 62') (Alli 11')

PLAYER RATINGS

Manchester United: De Gea 6, Valencia 7, Jones 7, Smalling 7, Young 7, Matic 6, Herrera 7, Pogba 7, Lingard 7, Lukaku 7, Alexis 7. Subs: Darmian 7, Fellaini 6, Rashford 6.

Tottenham Hotspur: Vorm, 5 Trippier 6, Sanchez 6, Vertonghen 6, Davies 6, Dier 6, Dembele 6, Eriksen 7, Alli 6, Son 5, Kane 5. Subs: Wanyama 6, Lamela 6, Lucas 6.

First half-ah goal khat ve ve an khung. Tan atanga minute 11-na lekah Eriksen chuan Davinson Sanchez-a ball vawrh tha tak chu mual dinglam sirah tlanpuiin box dinglam atang chuan a cross a, far post-a lo tlanlut Dele Alli thlawh luh pahin a half volley goal mawi kher mai. Hemi hnu chiah hian Eriksen chuan Harry Kane ball pek a pet goal teuh hle bawk.

Manchester United chuan an siphurh rulh tumin na takin an nawr let, 24 mins-ah an siphurh an rul nghal. Pogba chuan Dembele ball chhuhsakin mual veilam sir atangin a cross a, defender pahnih karah Sanchez chuan a tauh goal, United chuan an siphurh an rul. Sanchez hian Wembley Stadium-a FA Cup match-ah a zawnin game 5 atangin goal 6 a khung a, Pogba hian a game hnuhnung 4 atangin goal hnih a khung bakah assist vawi hnih a nei ta a ni.

First half tawp dawnah chance vawi khat ve ve an nei, box pawn atanga Pogba shot chu Spurs goalkeeper Michel Vorm chuan a lo beng per hman a. Dier shot pawh Smalling chuan lo dang kawiin United goal post a per dawp, De Gea chuan a thlir tawp ringawt. Valencia a vannei hle a, Dele Alli a tlawh, referee Anthony Taylor chuan yellow card a pe hlauh.

Second half tir lamah an innawr tawk dun hle, goal hlauhawm a awm hleithei lo. 62 mins-ah Herrera chuan United goal hnihna a khung. Box veilam atanga Sanchez ball chu Lukaku chuan control thei lovin a lum tlang, Lingard chuan Herrera tan kianin, ani chuan box chhung chiah atangin lei hrulah a shot, Spurs goalkeeper Vorm chuan a khawih hman lo, 2-1 in United chuan hma an hruai ta.

Minute 15 vel a la awm tihin Tottenham chuan Eriksen hmangin an siphurh an rul teuh kher mai. Box pawn atanga Eriksen shot tha zet chu a out chiah chiah, hemi hnu chiah hian United chuan Pogba hmangin an chhanglet lehnghal zat a. Pogba hian box pawn dinglam atangin kawh zetin a shot, Spurs goalkeeper Vorm chuan a lo save tha hle.

Spurs chuan an siphurh rulh ngei tumin an nawr na hle a, hetih lai hian United chuan counter attack an nei thut thut a, Lukaku leh Rashford te chuan hun tawp dawn lamah chance an nei, Rashford chuan defender pakhat chiah a hmachhawn tawh laiin goal a khung thei lo, Dier chuan box chhungah a lo dan sak a ni. Hun a tawp a, Manchester United chuan 2-1 in hnehna an chang a, Pathianni zana Chelsea leh Southampton chak zawk zawk final-ah an hmachhawn dawn a ni.

Team hnihte hian shots vawi 12 ve ve an nei a, Spurs ball posession-ah sang zawkin 63% an nei a, pass accuracy-ah United sang zawkin 87% an neih laiin Spurs-in 76% an nei. Chance hi team hnihte hian vawi 11 ve ve an siam a ni. United tlarhnung an khel tha hle, Spurs hmatawng ten hna an thawk hleithei lo. Herrera a khel tha tak zet a, Spurs attacking innghahna ni thin Son pawhin tihngaihna a hre lo a ni. Herrera hian pass vawi 48 neiin pass completed 83% lai a nei a, interception vawi 3 neiin tackle hlawhtling vawi 5 a nei a, foul vawi 4 a nei bawk.

Copyright © inkhel.com 2024. All rights reserved.