08 Jan 2017 11:17

digimalt

​Sports ngainat hi a va lo tangkai tak em!

Hmeichhe pakhat chu fanu mal a ni a, chhungkaw khawsa thei pangngai taka seilian a ni. A naupan lai atang rengin thil tha ber ber pek a ni a, School-ah pawh a chhung ten pakhatna nih tir tumin an bei a, pakhatna a ni chho zel bawk.

Thuamhnaw a awh ber ber leisak a ni a, amah kawm tur pawh mi fel tak a chhung ten an thlan sak thin nghe nghe. Kohhranah inhmangin chawimawina ropui tak tak hlan a ni a, mi nun tluang, mi fel leh Pathian thuawih tia sawi thin a ni.

Ngaihzawngah pawh a duh tak tlangval a nei a, a khawvel hi a tluang purh a ni ber mai. Pasal duhawm tak a nei a, an inneih ni pawhin an han lawm ropui mai mai khawp a, an sawmte zawng zawng an kal emaw tih mai tur khawpin mipui an tam a ni.

A nun a tluang a, a pang ti na tu an awm lo. Tichuan, fapa duhawm tak an nei a, chutia hlim taka an awm lai chuan an fapa thla 6 mi lek chu a boral ta tlat mai le. A nunah a vawi khat nan harsatna a tawk ve ta, a hrethiam lo kher mai. A tuar em em a, midang ai mahin a tuar, a at phah ta hial a!

Henu nena thanglian chho tlangval pakhat chanchin tarlang ve lawk ila. Chhungkaw pangngai tak atanga seilian ve tho a ni a. Ani erawh a naupan lai atanga Sports ngaina em em a ni. Football team-ah te tel chhovin; a chang leh an champion a, a chang leh rilru na takin an chak lova. Referee thutlukna dik lo tak tak tawn chang lah an ngah.

School an kal lai pawhin pakhatna ni char char thin mahse Sports atangin zirchhuah ropui tak a nei tlat mai. 'Engtik lai pawhin a champion theih loh; engtik lai pawhin a chak reng theih lo; engtik lai pawhin pakhatna a nih reng theih lo,' tih hi a hrechiang em em a ni.

A lo puitling chho a, a hmangaih ber pawh nupuiah a nei thei ta lo, a tuar hle, mahse 'No.2 nih chang a awm thin, No. 3 emaw a tawp ber nih chang pawh a awm tur a ni', tih hi a hriat chian avangin khawvel chu huaisen takin a hmachhawn a. Hlimna leh lawmna chi hrang hrang tawng mahse vanduaina chi hrang hrang a tawng ve bawk, an fanu an chan ve bawk a, chumi tum pawh chuan tuar hle mahse nun awmzia a hrethiam tawh si a, hun harsa takah pawh thil a thlir thiam, mi chak leh tuarchhel tia sawi a ni ta a ni.

Hlimna leh lawmnate hi kan chan tur a nih laiin lungngaihna leh harsatna chi hrang hrang pawh hi kan ta a ni. Sports-ah chuan a changin kan lam a, a changin kan tap a, chu chu mihring nunphung a ni tih kan hriatthiam phah. Harsatna chi hrang hrang tawng tawhte kianga awm chu a hahdamthlak an tih fo hi a chhan dik tak chu anni chuan nun hi an lo chhiar thiam tawh vang a ni.