Portuguese club Sporting Lisbon chuan Academy player ni turin kum 17 mi Martunis an la lut, he chanchin hian khawvel a dengchhuak nghal. Martunis hi 2004-a Tsunami-in Indonesia a nuai tuma dam khawchhuak kha a ni a, kum 7 mi lek niin ni 21 lai eitur mumal awm lova a khawsak hnuah dama chhar a ni a, Martunis hian a nu leh a unau pahnih Tsunami vang hian a chan nghe nghe a, hetia dama an chhar lai hian Portugal jersey a lo ha ngei bawk a. A kawr hak leh a tumruhna vangin dinhmun thaah a ding chho ta mek a ni.
2004 Boxing Day kha a ni a, Indian Ocean chu lirnghing na tak 9.3 magnitude in a sawi. Hei vang hian tuifawn sang tak chuan Indonesia vaukam chu a'n thuahfai ta tak tak mai a. Mi 230,000 laiin nunna an chan a, naupang tam takin an nu leh pa te an chan bawk a. Martunis leh a thiante chuan he thil thlen lai hian Football an lo khel a, tuifawn chuan a la ta, ruang tam tak karah ni 18 chhung teh meuh mai noodles pack leh soft drinks vel ringin a khawsa a.
A mah chauhvin ni 21 lai chu a khawsa ta, eitur a tlachham a, thih chiah hmabak a nei tawh. Chutih laiin vanneihna chuan a nang ta hlauh mai. Chanchinbumite chuan an chhar hlauh mai a, Save the Children member te chuan damdawi inah an kalpui nghal a. Kum 7 mi lek hian Portugal ram Jersey, Rui Costa kawr, Jersey number 10 ngei chu a lo hak avangin Portuguese FA chuan a ngaihtuah chhunzawm nghal zat a. Chhawmdawlnate pein a seilen zelna kawngah Portuguese FA chuan Martunis chu a enkawl zui ta a.
Chhiatna a thlen atanga kum thum hnuah Ronaldo chuan a tlawh a, Ronaldo hnenah Portugal ram tana khelh a chak thu leh Football hmanga eizawn a chak thu a lo hrilh nghe nghe. Portuguese FA chuan 2005 khan an rama zin turin an sawm nghe nghe a. Naupang huaisen, thih pawh hlau lo a ni a, khang harsatna kara a awm chung pawh khan thih a hlauh loh thu leh Football hmanga eizawn chu a chak ber a nih avanga hma lam a pan thu Martunis hian a sawi nghe nghe a ni.
Tichuan le, a duhthusam chu a thleng dik chho ta zel, kum 17 mi Martunis chu Sporting Lisbon chuan academy player ni turin a lalut ta rup mai le. Under 19-ah a khel anga, Cristiano Ronaldo, Luis Figo, Nani, Eric Dier, Ricardo Quaresma, Simao, Joao Moutinho, Jose Fonte, Silvestre Varela, Miguel Veloso, Nuno Valente leh Luis Boa Morte-te inzir chhuahna Football Academy atang hian thiamna tam tak a zir chhuak ngei dawn, harsatna tam tak a paltlang hnuah a beiseina leh tumte chu a thleng dik chho ta mek a ni.
Source : MailOne