Golden State Warriors player pawimawh pahnih Klay Thompson leh Steph Curry(Splash brothers)-te tun hnaiah an khel țha lo hle a, Kevin Durant a inhliam bawk nen NBA expert-te chuan Warriors hi an tlakhniam deuh an rin thu an sawi nasa hle.

Warriors hian conference game an khelh hnuhnung berah Chicago Bulls an hneh lo a, Bulls an hneh lo hma hian Philadelphia 76'ers laka an lo tlawm tawh bawk avangin game 146 hnua game zawna an chak loh zawnna hmasa ber a ni.

Warriors game hnuhnung pathumah Splash brothers hian attempts 129 nei mahse basket 43 chiah an nei thei a, an ropuina ber 3 points-ah attempts 63 atangin basket 11 chiah an nei bawk. Warriors tan Splash brothers an pawimawh a, tun hnaiah khel țha lo mahse Curry chuan a zam phah loh thu a sawi.

"Tun hnaiah ka lut(basket nei lo) thei lo deuh a, nimahsela ka khelh dan ka thlak phah dawn lo. Hmunawl ka neih chuan 3 points shoot zel ka duh a, rem lo chung chunga shoot erawh ka tum lo. Ka career ințan ațanga ka khelh dan a ni a, game thum lek ka khelh chhiat avang maiin ka khelh dan ka thlak lo ang," tiin tun hnaiah khel chhe mahse a zam lo tih a sawi.