Nimin khan Special Olympic Summer Games neih zawh taka India ram tana fehchhuak Mizo infiammite chu ropui taka lawm an ni a, Vanapa Hall-ah lawmna hun hman chhunzawm a ni a, Sports Minister Zodintluanga chuan Vohbik infiammite chu sum fai lawmman an pek ngei tur thu a sawi a ni.
July ni 25 atanga August ni 2, 2015 chhung khan Los Angeles-ah Special Olympic Summer Games hi neih a ni a, Mizo infiammi paruk leh hmeichhe basketball coach Sarah Lalmuankimite chu India ram aiawhin an fehchhuak.
Hmeichhe 100m race-ah Zohlupuii(Tuikhuahtlang) chuan bronze medal a hawn a, 7 aside Football team-ah Thanghmingliana, Lalfakzuala leh Lalthansangate chu telin, India ram tan bronze an rawn hawn a.
11 aside football-ah Alfred Lalchhanhima leh Lalmawizualaten India ai an awh bawk a, Sarah Lalmuankimi enkawlna hnuaiah India basketball team chuan bronze medal an la bawk a ni.
Sports Minister chuan India ram kilkhawra awm Mizoten hetianga inelna ropuia medal an rawn hawn thei hi ropui a tih thu leh an zirtirtute thawhrah chu ropui a tih thu a sawi nghe nghe a ni.