Spanish GP-ah Cal Crutchlow-a’n pole position a chang

06th May 2018, 03:05AM

MotoGP Spanish Grand Prix neih turah Cal Crutchlow chuan pole position a chang.

LCR Honda rider hi qualifying-ah a tlan tha hle a, lap record siamin 2016 hnua a vawikhatna atan pole position a chang a. Pole position a chan hnuhnun ber chu kum hnih kalta kha niin, Silverstone-ah a ni.

Repsol Honda rider Dani Pedrosa chu pahnihnaah a awm dawn a, Pedrosa hian 2017 khan a vawi thumna atan Spanish GP-ah a chak ber a, kuminah pawh hian chak ber a inbeisei leh viau ang a. Argentina-ah a ban rek a tihnat avangin a la damkawr angreng a, hei vang hian a beisei ang a ni pha lo ang tih erawh a hlauhawm hle.

Monster Yamaha Tech 3 rider Johann Zarco chu pathumnaah a awm a, Ducati rider Jorge Lorenzo chu palinaah a awm bawk a. Defending champion Marc Marquez chuan a team-mate Pedrosa chu a tluk pha lo hle a, pangana atangin a tlan tan dawn a ni.

Championship hmahruaitu Andrea Dovizioso chu Q1 ah chak ber mahse a che tha tluantling thei lo a, pariatnaah a awm thei chauh a. Movistar Yamaha tan ni duhawm a ni lem lo a, Valentino Rossi chu 10-naah a awm a, Maverick Vinales pawh 11-na a ni pha chauh bawk.

Qualifying result:
1. Cal Crutchlow (LCR Honda): 1:37.653
2. Dani Pedrosa (Repsol Honda) 1:37.912
3. Johann Zarco (Monster Yamaha Tech 3) 1:37.956
4. Jorge Lorenzo (Ducati) 1:37.969
5. Marc Marquez (Repsol Honda) 1:37.977
6. Alex Rins (Suzuki Ecstar) 1:37.984
7. Andrea Iannone (Suzuki Ecstar) 1:37.987
8. Andrea Dovizioso (Ducati) 1:38.029
9. Danilo Petrucci (Alma Pramac) 1:38.086
10. Valentino Rossi (Movistar Yamaha) 1:38.267

Copyright © inkhel.com 2024. All rights reserved.