13 Jun 2018 06:51

inkhel

Spain coach atan Fernando Hierro an ruat

Spanish Football Federation (RFEF) chuan World Cup tan hma niin an coach Julen Lopetegui chu an ban a, a hmun ruak luah tur hian Fernando Hierro an ruat nghal.

Julen Lopetegui chu Real Madrid nen an inbe rem a, World Cup zawh veleh an manager ni turin thuthlung an siam a, hei vang hian RFEF chuan Lopetegui hi an ban thut a. A aiawh tur hian RFEF sporting director ni mek Fernando Hierro chu an ruat nghal a ni.

RFEF chuan thuchhuah siamin, “Fernando Hierro chuan Russia rama World Cup khelh turah Spain national team a enkawl dawn a, ruat a nih hnuah chanchinthar lakhawmtute a hmachhawn nghal ang a, RFEF president Luis Rubiales chuan a tawiawm ang a. Team te hi training a neihpui nghal ang a, Zirtawpni hian Sochi-ah Portugal leh Spain inkhelh hunah team te hi a enkawl tan dawn a ni,” tiin an tarlang.

Thawhlehni zing khan Real Madrid chuan season thara an coach tur chu Lopetegui a nih thu hi an puang a, RFEF president Luis Rubiales chuan an ramin World Cup khel tura an inbuatsaih ngawrh em em laia hetiang boruak an lo nei hi Spanish club te chu demawm a tih thu a sawi a. Anmahni vangin national team te boruak a buai phah vek tih a sawi.

Fernando Hierro hi Real Madrid leh Bolton Wanderers player hlui a ni a, management lamah hian kum khat chauh tawn hriat a la nei ve a, 2016 khan Real Oviedo a enkawl a ni.

Player ang chuan tawn hriat a ngah tawh hle a, Spanish defender thin hian Bernabeu-ah La Liga title vawi 5 zet a lak bakah UEFA Champions League title pawh vawi 3 a la hman a ni.