Southampton chuan Stamfrod Bridge-ah Chelsea an len chilh a, mual neitu lamin goal khung hmasa mahse Southampton hian 3-1 laiin an chhu let, 2002 hnu lamah a vawi khat nan Saints chuan hnehna an chang ta a ni.
Chelsea tan minute 10-na lekah Willian chuan free kick atangin ropui lutukin a pet goal a, mahse first half tawp dawn tepah Pelle siam tha zet chu Davis chuan pet goal-in Saints si phurh a rul. Second half-ah Mane leh Pelle te chuan Southampton tan goal an khung leh bawk a, 3-1 laiin Southampton chuan hnehna an chang ta a ni.
Chelsea 1-3 Southampton
(Willian 10') (Davis 43′ Mané 60′ Pellè 72′)
PLAYER RATINGS (data source : eurosport)
Chelsea: Begovic 6, Ivanovic 4, Cahill 5, Terry 4, Azpilicueta 5, Ramires 5, Fabregas 4, Willian 6, Oscar 5, Hazard 6, Falcao 4.
Subs: Matic 5, Pedro 5, Remy 5.
Southampton: Stekelenburg 6, Cedric 6, Fonte 6, van Dijk 6, Bertrand 6, Romeu 5, Wanyama 6, S. Davis 7, Tadic 6, Mane 9, Pelle 7.
Subs:Yoshida 6, Ward-Prowse 6, Rodriguez 6.
Southampton lamin chak an phu zawk a, goal hlauhawm pawh an nei hnem zawk. Willian-a free kick erawh a mawi a, hla tak atangin cross bar hnuaiah post ler perin a thlawk lut a ni. Southampton goal pawh a mawi, 43rd mins-ah Pelle chest thlak chu Davis chuan a hlap nghal a, Begovic chuan a ban phak lo chiang kher mai.
Chelsea defender te tihsual avangin goal a lut leh ta, 60th mins-ah Cahill clear chhe zet chu Saints hian goal khung nan an hmang a, Graziano Pellè ball pek tha zet chu Terry a lo intehsual bawk nen, Mane tan chance tha tak a ni chhunzawm a, a pet goal ta bawk a ni. Goal thumna hi counter attack atanga lut a ni a, Pelle chuan Hazard-a ball a chhuhsak a, Mane a pe chhunzawm. Chak takin an tlan phei a, Mane chuan Pelle a pe leh a, a ni hian box chhung chiah chiah atangin far post lamah lei hrulah kawh zetin a shot a, a goal mawi hle bawk a ni.
Chelsea hian tun season khel 8 atangin point 8 chiah an la hlawh chhuak a, table-ah 16-na an ni mek. Goal an chhuah hnem hle bawk a, goal 17 lai an chhuah ta, anni aiaa chhuah tam team pakhat chiah an awm, chu chu Sunderland an ni a, goal 18 an chhuah tawh a ni. Stamfortd Bridge-ah Chelsea supporter te chuan Mourinho leh a player te an BOOOOO ta tlat mai le. Jose Mourinho-a hnuaiah Chelsea hi vawi thum Stamford Bridge-ah an tlawm ta. Tun season-ah Crystal Palace lakah Chelsea hi an home-ah an tlawm tawh a, Southampton lakah an tlawm leh ta.
Inkhelh zawhah Mourinho chuan,"Penalty tur dik tak min pe lo kha a pawi a ni. Referee te hian dik takin ham se, dik takin an ham ngam loh avangin kan tuar ta thin a ni.
"Tin, ka tlan chhe dawn lova, club-in min ban a duh chuan min ban thei reng alawm. Mahse min ban a nih chuan Chelsea hian a manager neih tawh zinga la tha ber a ban tihna a ni ang.
"Referee te avangin ka player ten inrintawkna an tlachham a, kan chak loh thinna chu mimal tlemte tihsual thin vang a ni," tiin Mourinho chuan a sawi.
Falcao kha penalty a hlawh dawn emaw tih laiin referee Robert Madley khan dive tiin yellow card a pe. Kha kha penalty tur niin Mourinho chuan a ngai. First half-ah Southampton khan penalty hlawh chhuah theihna tur an nei ve tho niin a lang. Box chhungah Ivanovic khan van Dijk kha a pawt thal tawp a, referee khan a hmu reng, mahse a pe lo. Mane pawh box chhungah Ivanovic khan a kalh thlu ? Referee chuan Mane kha dive niin a hria a, yellow card a pe a ni.
Diego Costa chu hrem a nih avangin Southamton a hmachhawn ve thei lova, chuvang chuan Falcao chuan chance a nei ta a. Hetih lai hian Chelsea hmatawng an hlauhawm loh hle tih a lang chiang a, tlar hma leh tlar hnung Chelsea hian an hna an la thawh tak tak tir thei rih lo a ni.
picture credit : Reuters