16 Apr 2017 04:04

Serchhip Chelsea

Sir Alex sawmchhuah zawhloh Terry

Kum 1994-1995 season khan Manchester United-in Premier League leh FA Cup nomawi an chawi a, heti hunlaia Man United manager Sir Alex Ferguson chuan naupang tete lakhawmin team țha chho turin din leh a rilruk nghal.

Scottish manager thluak țha zet hian a team dina tel tur hian hetih hunlaia kum 14 mi chauh la ni John Terry thiamna a hmuh hmaih lo va lakluh a tum nghal bur.

Hetih hunlai hian Terry hi 'holding midfielder' ala ni a, Sir Alex pawh hian an team din thar tura mi țangkai ni thei dawn a hriat vangin chhuah a tum hauh lo.

Football chanchina manager ropui ber pakhat sawmna hi hnawlin Terry hian Chelsea a thlang ta zawk a, a tisual lem lo.

England captain hlui hian The Blues hi Premier League nomawi vawili chawipui tawhin FA Cup pawh vawinga lai a chawipui tawh a, League Cup-ah vawithum a champion pui tawh bawk.

Hei mai hi ala nilo, 'Terrific Terry' hian Chelsea hi Champions League leh Europa League-ah vawikhat ve ve a champion pui tawh bawk a England tan game 78-ah a inlan hman bawk.

2005-2004 season-a PFA Players' Player of the Year hian kum 1991 khan midfielder angin West Ham United Academy a zawm a, kum 1995 khan Chelsea-in an lalut a kum 2000 khan loan-in Nottingham Forest-ah khelchhuak a hei bak hi chu London club ațangin a chhuak leh tawh rih lo.

Kum 2006 khan The Observer-in an kawmnaah Terry hian Sir Alex nen an indawr dan a sawi a, heti khawpa amah duhtu Red Devils a zawm lo hi amak zawk hial a ni.

Terry chuan, "Manchester United țantu chhungkua ațanga lo seilian ka ni a. Naupanlai chuan champion thei team țan mai hi kan duh țhin a ka pa leh pa pu pawh Manchester United țantu an ni nghe nghe."

"Mahse Chelsea hi ka zawm tirh ni ațang khan ka awm duhna a ni tih ka hria a, nuam ka ti a Manchester United pawhin minlo sawm. Alex Ferguson nen kan in hmu a, a lawmawm khawp mai. Sikul kan kal laiin kar hnih chhung chu Manchester-ah kalin an club naupangte nen kan train a, inkhel hoin a hnuah kan haw."

"Manchester United-in minlo biak laia thil pakhat lawmawm deuh chu Alex Ferguson-a'n an inkhel game khat en tura min sawm leh an player-te bula chaw chhun (lunch) ei tura min sawm kha a ni."

"A sawmna kan ti hlawhtling a, kei, ka nu, ka pa leh ka unaupate kan kal. Hlim takin min siam a, autograph-te min sign sak a Premiership nomawi thla kan lakpui bawk."

"Chelsea ka zawm tur kha ka pa tan pawh hriatthiam a har viau chuan ka ring a, mahse amah titipuiin thutlukna dik a ni tih ka hrilh kha a ngai miau si a ni." tiin a hun hmasa lam chanchin hi a sawi.

A vanglaia defender țha ber tih ngam Terry hian kum 2005, 2008 leh 2009 khan UEFA Club Defender of the Year award a dawng thei a, kum 2005 leh 2009 inkar khan season nga chhung FIFPro World XI-ah a lang pha zat zat bawk.

TERRY CHANCHIN TLANGPUI

Kum 2001 leh 2006-a Chelsea Player of the Year award dawngtu Terry hian kum 1980 December ni 7 khan khawvel eng a rawn hmu țan a, a naupan deuh lai chuan Sunday league team Senrab tan a khel țhin a he team-ah hian Premier League-a player mikhual lo ni zui ta Sol Campbell, Jermain Defoe, Bobby Zamora, Ledley King leh Jlloyd Samuel-te pawh an khel ve țhin.

Kum 11 mi anihin West Ham United Academy chuan an lalut hetih hunlai hian midfielder a ni a tlarhnung lamah a tlan ngai lo.

Kum 14 mi anih chuan a thiamna hmuh hmaih bik lotu Chelsea-in an lalut a, The Blues hian an club Reserve Team-ah dahin defender an nei mumal si lo va Terry hi pawtletin central defender-ah an hmang chho va he position-ah hian tun thlengin a khel chho ta a ni.

A hmingpum John George Terry hian Chelsea first team tan a game hmasa ber erawh kum 1998 October ni 28 khan League Cup-a Aston Villa an hmachhawn țumin a khel a, kum 2000 khan intuaihriam turin Nottingham Forest-ah loan-in a khelchhuak zuai.

2000-2001 season ațang khan Chelsea hian a chhawr rim țan chauh a, kum 2004-2005 season ațang khan The Blues hian team captain atan an hmang țan bawk a tun thlengin he nihna hi ala chelh.

Terry hian England national team tan a game hmasa ber chu kum 2003 June thla khan Serbia and Montenegro an hmachhawn țumin a khel a, kum 2006 August thla leh kum 2010 February thla inkar khan Three Lions captain hi a ni a, kum 2011 March thla leh kum 2012 February thla inkar khan England national captain nihna hi a chelh leh bawk.

Kum 2012 September ni 23 khan ram tan inkhelh a chawlhsan thu a puang a England tan hian game 78 khelin goal ruk (6) a khung.

* Photo: Getty