Simona Halep-i’n Grand Slam title a la ve ta

10th June 2018, 04:06AM

World No. 1 Simona Halep chuan French Open final-ah Sloane Stephens hnehin a vawi khatna atan Grand Slam title a la ve ta.

Tournament lian final pathuma tlawm tawh Halep chuan Roland Garros-ah set hmasa ber a hloh nghal a, mahse kum 26-a upa Romanian chu a rawn insiam tha leh a, US Open champion chu a rawn lehthal leh ta a ni.

Set hmasa berah American 10th seed Sloane Stephens chu 6-3 in a chak a, set hnihnaah erawh Halep chu 6-4 in a chak a, set thumnaah pawh Halep bawk hi a chungnung a, 6-1 a chak lehin French Open champion hi a ni ta a ni.

Simona Halep hi French Open final-ah hian vawi hnih a lo tlawm tawh a, 2014 final-ah Maria Sharapova a hneh lo a, 2017 final-ah Jelena Ostapenko a hneh lo leh bawk a. Kumin Australian Open final-ah pawh Caroline Wozniacki lakah a tlawm bawk a ni.

An inkhelh zawh hian Halep chuan a racquet a thlauh thla a, lawm avangin a mittui a tla a, a hmai a hup bawk a. Sloane Stephens chuan Halep hi va panin lawmpuinan a va kuah a, Court Philippe Chatrier-a mipui pawhin standing ovation an lo pe bawk a. Halep hian mipui awmna lama a chhungte leh coaching team te chu a pan zui a ni.

Kum 25-a upa Sloane Stephens hian Grand Slam final a luh vawi hnihna a ni a, Roland Garros-ah hian fourth round a la pel thei lo a tun tuma final a lut pawh hi tam tak chuan mak an ti hle a. Final kalkawngah hian set khat chiah a hloh a, amah aia seeded sang a hmachhawn lo a, Halep hi a aia sang a hmachhawn chhun chu a ni.

Halep hi final-a vawi thum tlawm tawh hnua Grand Slam title la leh thei hmasa ber niin, a hmain Kim Clijsters, Chris Evert leh Jana Novotna te chuan vawi thum tlawm hnuah Grand Slam title an lo la tawh a ni.

Romanian hmeichhe zingah chuan Halep hi Grand Slam title la thei hmasa ber dawttu niin, 1978 khan Virginia Ruzici chu Roland Garros-ah hian a lo champion tawh bawk a. Open era-ah chuan Halep hi hmeichhe zinga Roland Garros title la thei 27-na a ni.

Grand Slam title la tura beidawng duh lo Halep hian vawi 33-naah title a la thei a, Halep aia tum rei hi hmeichhe zingah 7 chiah an awm a. 2008 khan Halep hian Roland Garros girls’ title a la a, French Open title a la zui leh a, hetianga ti thei parukna a ni.

Simona Halep hian Roland Garros bikah vawi 24 chak hmel a hmu tawh a, vawi 9 a tlawm tawh bawk a. Halep aia chak percentage sang chu Serena Williams, Maria Sharapova leh Svetlana Kuznetsova te chauh an ni.

Copyright © inkhel.com 2024. All rights reserved.