​Silchar-a Mizoram Team țawiawmtute hnenah MFA-in lawmthu an sawi

06th February 2017, 04:02AM

Mizoram football team chu February 4, 2017 khan 31st Captain NM Gupta Football Tournament, Silchar-a khelhah an champion a, final-ah Army Green chu 1-0 in an hneh.

Mizoram Football Association chuan he inkhelah hian Santosh Trophy Final Round khel tura inbuatsaih mek Mizoram team a tir a, an khingpuite hneh chho zelin final-ah hian Durand Cup champion ni lai Army Green chu Lalfakzuala goal thun hmangin an hneh. Mizoram hian champion trophy bakah Rs 5,00,000 an dawng.

Mizoram coach lalsangzuala Hmar chu Best Coach-ah thlan a ni a, Best Goalkeeper-ah Lalmuanawma thlan a ni a, Best Forward-ah Lalbiakhlua thlan a ni a, anni hian trophy leh Rs 5,000 theuh an dawng. Lalbiakhlua hi Best Player-ah thlan a ni a, Rs 10,000 a dawng bawk a, Hero of the Final Lalfakzuala'n Rs 5,000 a dawng bawk.

He tournament-a Mizoram team buaipuitu leh țantu Silchar leh a chhehvela Mizo awmte chungah MFA chuan lawmthu a sawi a, Silchar YMA hnenah lawmthu sawina Rs 10,000 a hlan dawn a ni. Silchar-a Assistant Resident Commissioner Pu T Vanlalmalsawmsanga leh a thawhpuite chungah MFA chuan lawmthu a sawi a; he tournament atana buaipuitu leh sawmtu Major General MV Chandran, Inspector General of AR (East) leh Brig MS Mokha, Commander 23 Sector AR-te chungah MFA chuan lawmthu a sawi bawk.

Copyright © inkhel.com 2024. All rights reserved.