​Sialsuk Premier League 2017 Champions Robert Lalnunpuia FC

23rd October 2017, 03:10AM

Modi Distillery Group (Guwahati) leh Kapchawla & Family te Sponsorship na hnuaia khelh Sialsuk Premier League 2017 chu October 21 (inrinni) khan Sialsuk Play ground ah khelh zawh a ni ta, final ah hian Robert Lalnunpuia FC (Sialsuk) leh Sailam FC (Sailam) te an inkhel a, Robert Lalnunpuia FC hian 3-1 a Sailam FC hi hnehin Sialsuk Premier League 2017 champion an ni ta a ni.

Thli tleh leh ruahsur nasa avangin SPL final hi a hun takah țan theih a ni lo a, Khuallian S. Malsawmtluanga pawh khaw chhe tak hnuaiah a rawn kal thei a, thli tleh leh ruahsurin inkhel entu mipuite a dang kir zo lo, an duhthusam khua ni lo mahse RB leh Sailam fans ten an club țan te au phur turin khuang nen field an pan a, final boruak tih takah thawm a nà kher mai!

RB FC leh Sailam FC te hi SPL league round ah vawi hnih an inkhel tawh a, inkhelh hmasak zawkah Sailam hian RB hi 5-2 in an lo hneh tawh a, inkhelh vawi hnihnaah team pahnih te hi 3-3 in an inhnehtawk thung a ni. Chutiang boruak karah chuan inkhel turin player te field chhungah an lut a, Sialsuk leh Sailam mipui ten an hmuh duh inkhel an nghak chhuak ta.

Sailam FC 1-3 Robert Lalnunpuia FC

(Lalrinkima 12') (C. Malsawmkima 18', Peter Thangliana 41', Lalruatsanga 44')

Hamrik a ri chiah a, Team pahnih te tho thang a țha nghal a, chak ngei tumin bul an țan. RB lamin chance an nei hmasa zawk a, minute 8 naah yard 35 vel ațanga freekick an hmuh chu RB midfielder Remsiama'n petin goal kham a per dawp mai. Sailam lamin an nawr let ve nghal a, an forward jersey no 14 Lalrinkima a hlauhawm nghal, a chance hmuh hmasak ber goal ah a chantir nghal tlat mai. Minute 12 naah Rinkima hian yard 35 vela hla ațanga a ball hmuh chu RB goal lamah kawh zetin a shot a, goal kham perin a sawt lut a, a mawi kher mai. RB keeper Rongenga tan dan hman a ni lo. Rinkima hian tun SPL a a goal 8 khungna chiah a ni.

RB an țhangharh nghal a, an si phurh sut tumin an bei let nghal. Mahse duh angin player te an che thei lo. Ruah a sur a, thli a thawt deuh reng avangin inkhelh a harsa a, field a nal nen, player te tan ball khawih a harsa a, ball chan veleha țhiante pass nghal zung zung mai loh chu tih theih dang a awm lo. RB lamin midfield ah game awmze nei an siam thei țan a, Vena leh Remsiama'n awmzei neiin an forward te tan ball an vawrh lut a, Sailam lam an bet țan. Sailam lam țanna hawi zawnga thli a thawt nasat avangin Sailam lam tan chet a harsa zual a, tlar hnungah Rinmawia leh a țhiante an rim viau mai. Minute 19 naah RB lamin an si phurh an sut a, jersey no 13 C. Malsawmkima chuan a chance hmuh a hlah duh lo, a pet goal chiang hle. Tun SPL a Kimkima goal 9 na chiah a ni.

Team pahnih te an țang zual sauh a, field nal nen game a hmuhnawm hle. Sailam lamin minute 26 naah freekick an hmu a, an captain Zahawma chu lo pen chhuakin goal kham chung chiah chiahah a kal hlauh mai. An innawr tawn zel a, minute 41 naah goal kan hmu leh ta. Sailam midfielder jersey no 5 Zoramsanga chuan penalty box pawn deuh, corner spot bulah a foul a, he freekick hi RB jersey no 7 Remsiama'n țha taka thlawh lutin Sailam player te zuan aia sanga lo zuang RB defensive midfielder Peter Thangliana chuan Sailam goal net puar lawpin a tauh goal a, Sailam keeper Hriata tan dan ngaihna a awm lo. Sailam lam insiam rem hmain RB bawkin goal an khung chhunzawm a, minute 44 naah an goal khatna khungtu C. Malsawmkima chuan Sailam defender te inkarah ball țha tak a vawrh lut a, RB striker Lalruatsanga chuan um lutin Sailam goal kilah kawh zetin a hlap lut a, mipui lam thawm a țha kher mai - RB in 3-1 in hma an hruai ta. First half a zo dawn hnai a, Sailam lamin goal khat tal khung tumin an nawr let a, chance vawi hnih an nei chhunzawm nghal. Hun pek belh minute 46 naah Sailam midfielder Zoramsanga chuan chance a hmu a, a goal shot chu RB goal ban sirah chiah chiah lei hrulin a kal hlauh a, a uiawm ngei mai. Hemi hnu chiah hian Sailam forward Vanlalthara'n chance țha a hmu veleh a, mahse a hmang țangkai zo bik lo, goal sirah a kal. First half a zo.

Second half țan a ni leh a, Sailam lamin chak tur chuan goal thum tal an mamawh a, thil harsa niin lang mahse forward nei țha Sailam tan chuan thil huphurhawm niin a lang lo. Sailam lamin an nawr nghal a, mahse RB defence line ah Hunlawmawma, Rinpuia, Sangzela leh Chhandama te an ding khawng a, an mahni pui turin Peter Thangliana'n a hna a tlin bawk a, Sailam lamin an su tlang hlei thei tlat lo. Game danga hlauhawm țhin Sailam forward pahnih Thara leh Hlimawma thli leh ruah karah an che thei tlat lo a, Sailamin an nawr nat theih loh phah niin a lang. RB lam tum a chiang a, țul loa tha senga goal va nawr ve vak aiin hahdam taka an goal neih sa venhim a tawk tawh mai. First half aiin game a nung lo deuh a, Sailamin nawr bet mahse goal chance an hmu tam lo a, RB lam an inhnawh khat tawh a, Sailam tan chet lak a har tawh tlat. RB lam zawkin goal khung belh theihna hun remchang an hmu a, hun tawp hnaih minute 86 naah RB lamin an nawr let phei thut a, an goal thumna khungtu Ruatsanga'n Sailam keeper Hriata chauh a hmachhawn tawh a, a goal ngei tawh dawna a lan laiin Aibawk rawlthar Ruatsanga hian goal zawnah a pet thei tlat lo, hun a tawp zui. Sialsuk Premier League champion hmasa ber chu Robert Lalnunpui Football Club an ni ta.

Khaw chhiat vangin team pahnih ten an duh angin an khel thei lo tih a hriat a, a bikin Sailam forward te khaw chhe hnuaiah an che thei lo zual niin a lang. Khaw țha hnuaia inkhel ni ta se an inbei tawk lehzualin a rinawm a, result pawh hi danglam thei hial khawpin khaw țha leh khaw chhiaa inkhelh hi chu a danglam a ni. Team pahnih ten SPL season tir ațangin game hmuhnawm min entir chho char char a, hei aia sang zawk thleng thei tur player pawh an kawl dun nual mai.

Champion team hian lawmmanah trophy, medal bakah ₹ 10,000 an dawng a, pahnihna hian trophy, medal leh ₹ 5,000 an dawng bawk.

Mimal lawmman :

• Top Scorer (R. Lalthlengkima Award) - Zirhnehsanga (Dawngdawng FC with 18 goals).

• Best player (H. Duailova Award) - Lalsangzela (RB FC)

• Best Goalkeeper (V. Lalhmingmawia Award) - Lalhriatzuala (Sailam FC)

• Best Young Player (V. Laldailova Award) - C. Malsawmkima (RB FC)

• Fair Play (D&S Award) - S.L Intermix FC (Sailam)

Mimal chawimawina dawngte hian trophy, t.shirt leh ₹ 500 țheuh an an dawng a, Fair Play hian ₹, 500 an dawng bawk.

Copyright © inkhel.com 2024. All rights reserved.