​Sialhawk Express-in National Team a inkhalh thleng

13th May 2017, 11:05PM

Asian Cup khel turin National team pawh a inpuahchah mek zel, Kyrgyzstan hmachhawn thei turin Probable 35 thlan chhuah niin, Aizawl FC players te pawh koh an ni ve ta. Danmawia, Ruatthara, Albino Gomes te ram tana koh an ni ve ta a.

Hetia India team-a koh a nih chungchangah R. Laldanmawia chuan a beisei phak bak a tawn mek thu inkhel.com a hrilh.

"Ka naupan lai kha chuan National team-a khelh te hi chu ka chak ve thin alawm, ka tum pawh a ni chiah lo, chak/duhthusam ang hi a ni mai ang chu. Mahse ka inhliam ngun em em a, heti lam pawh hi ka suangtuahnaah pawh a lang phak tawh lo.

"Chutih laiin India senior team-a min ko hi ka lawm tak zet, a ropui ka ti thlawt a ni, ka tan chuan chawimawina a ni chiang mai. Pathian vang a ni a, ka hliam te a dam tawh a, tun dinhmun ka thlen theihna chhan hi Pathian vang a ni," tiin inkhel.com a hrilh.

I-League -ah goal 3 a khung bakah Hero Federation Cup 2017-ah goal thum khung tawhin, a team Aizawl FC chu semi final a luhpui a, a chawrchhuahna Sialhawk khuah footballer talent nei tha tak tak an awm nual em? Tih zawhna chu,

"Kan khua leh kan khaw chhehvel, Tuichangral khua hi football uarna hmun a ni a, thiam tak tak am awm thin. Hetih lai hian chhungkaw khawsak harsat avanga an tuina lama kal thei ta lo leh Mizoramin a hriat tak loh hi tam tak an awm. Kei chu ka vannei a, ka nu leh pate hian ka tuina hi min phur pui a, harsatna hrang hrang karah min pui tlat a, chu vang chu a ni e." tiin a chhang.

Kum 2009 khan Red Ribbon Inter Village Football Tournament-ah Sialhawk tan a inlan a, hetah hian Police Academy coach Pu Ramhluna chuan a hmu a, academy-ah a sawm lut ta a. Kum 2012 Mizoram Premier League tan a nih khan Dinthar FC chuan lalutin, hetah hian a champion pui a, best player a ni nghe nghe.

MPL Season hnihna leh thumnaah khan inhliam avangin a inkhel mumal lo, MPL season 4-ah Chanmari FC tan a khel a, Season 5-ah Chanmari West FC tan a khel leh a, Aizawl FC chuan lalutin I-League ah a champion pui ta a ni.

Academy-a a awm laia a coach Pu Ramhluna chuan, "Red Ribbon Inter Village Football Tournament-ah khan Sialhawk tan a rawn khel a, a inkhel ka hmuh atang khan a tha tih ka hre nghal, chutih laiin a la naupang khawp mai a, kum 14 atanga 15 vel niin ka hria.

"A taksa a pan a, ball a thiam em em lo, a chak a, goal a khung thei bawk a, goal khung tur hrim hrima piang an sawi ang hi niin ka hria. Tichuan Police acacemy-a awm turin ka sawm ta a.

"Academy-a a awm chhung hian nasa takin hma a sawn a, goal khung hi chu zirtir vak a ngai lo, a thiam sa, mahse ball receive leh dribbling leh ball khawih tam hrim hrim kha kan zirtir a, technique-ah hma a sawn phah nasa hle.

"Academy-a a awm chhung khan competitive match kan khelhpui nasa, hetih lai hian a la naupan em avangin 90 mins khel thei a ni lo, second half-ah te ka luhtir thin a, chakna goal hi a khung deuh ziah. A ho khan tournament kan khel nual, chungah chuan kan champion deuh vek a ni." tiin inkhel.com a hrilh.

Pu R. Lalramhluna chuan National team-a koh a nih chungchangah a lawmpui em em rualin hetiang em em hi a thlen phak a rin loh thu a sawi a.

"A mizia hi mi nunnem, inthlahrung leh zaidam tak a ni a, a tawng tlem em em bawk. Khatih lai kha chuan kan beisei phak tawk kha chu local football a ni a, local football-ah chuan a chungnung ber thleng a thlen theih ka ring. National team em em hi chu ka rilruah a lang phak lo, ka lawmpui tak zet a, a thawhrimna leh mahni a invawnna rah liau liau a ni," tiin.

National Under 16-ah Mizoram a champion pui a, Dr. TAo Football Tournament leh North East Games-ah Mizoram a champion pui leh a, Santosh Trophy-ah Mizoram a champion pui leh bakah I-League ah Aizawl FC a champion pui leh bawk a. Danmawia hian India ram chhunga Football inelnaa lawmman ropui tak tak chu a la deuh vek kan ti thei awm e.

Copyright © inkhel.com 2024. All rights reserved.