Maria Sharapova-i'n damdawi hman phal loh Meldonium a hman tih hmuhchhuah a nih hnuah thla 15 chhung hrem a ni a, an hremna a zawh hnua inelna a hmachhawn hmasak ber Stuttgart Open-ah game hnih a chak leh der tawh a ni.
Sharapova-i sawiseltu an tam a, hmeichhe tennis-a thuneitu sang ber Women's Tennis Association(WTA) lamin an duhsak bik niin an ngai. Kum 2013 Wimbledon finalist Eugneie Bouchard(23) chuan Sharapova inkhelh phalsak leh a ni chu a hriatthiam loh thu a sawi.
"Dik lo taka thil ti a ni a, hetiang mi hi chu eng infiamnaah pawh inkhelh phalsak tawh loh tur an ni. WTA hian an ti dik lo hlein ka hria a, player naupang zawkte hruaisual thei thil a ni. "Tisual pawh ni ula kan pawm leh thlap ang che u" an tihna a ni ber. Thil dik niin ka hre lo a, Sharapova ka ngaihsan thu hi ka sawi thei tawh lo," tiin Sharapova hremna chu a na tawk lo tih a sawi.
Sharapova chuan amah an sawiselnate chu chhanlet tumna a neih loh thu leh midangin a chungchang an sawi dan chu a buaina tur a ni loh thu a sawi ve bawk. Sharapova hi Madrid leh Rome Open-a khel turin wild-card entry pek a ni leh tawh a, tournament huaihtawtute'n Sharapova an la iai lo hle.