Nilaizan Champions League round of 16 inkhelah Sevilla chuan Premier League champion Leicester an mikhual a, 2-1 in Sevilla hnehna an chang.
He inkhelah hian Pablo Sarabia leh Joaquin Correa-te chuan Sevilla tan goal thunin an team-te a chakpui a, Leicester City tan Jamie Vardy chuan goal khat a thun ve bawk. He inkhelah hian mualneitu Sevilla-in inkhel an thunun tluan a, goal tam zawk thun thei ni mahse Leicester goalkeeper Kasper Schmeichel a chetthat zan a ni a, goal tura ngaih tam tak a save a ni.
Sevilla 2-1 Leicester
(Pablo Sarabia 25', Joaquin Correa 62') (Vardy 72')
Shots: 23 - 7
Shot on target: 8 - 2
Pass accuracy: 85% - 65%
Chances created: 18 - 6
Possession: 74% - 26%
Sevilla starting line-up (4-2-3-1): Sergio Rico; Mariano, Lenglet, Rami, Escudero; N'Zonzi, Nasri; Sarabia, Correa, Vitolo; Jovetic.
Sevilla substitutes: Soria, Kranevitter, Carrico, Iborra, Vietto, Ben Yedder, Vazquez.
Leicester starting line-up (4-4-2): Schmeichel; Simpson, Huth, Morgan, Fuchs; Mahrez, Ndidi, Drinkwater, Albrighton; Vardy, Musa.
Leicester substitutes: Zieler, Chilwell, King, Amartey, Okazaki, Gray, Benalouane.
Inkhel tan phat atangin Sevilla an hmuhnawm a, an che a rangin inkhel an thunun nghal. Khelmual laiah Nasri, Sarabia leh Vitolo-te an hmuhnawm a, Correa leh Jovetic-ten a khat tawkin Leicester tlarhnung an tibuai reng bawk. Leicester City lamin inkhel harsa an ti niin a lang a, champion khelhin an khel thei lo a ni ber. Sevilla lam hian minute 20 an khel tling tihin ball possession 70% an nei thei bawk.
Sevilla midfield leh an hmatawngte ball bawh a nat avangin Leicester City an talbuai thei hle a, Christian Fuchs-a'n Schmeichel a head pass tumna lamah a goal thelh bawk. Leicester buaina belhchhah turin captain Wes Morgan chuan penalty a chawi zui. Morgan hian Joaquin Correa chu penalty box chhungah a tlawh tlu a, referee-in a hmuh chian hle bawk avangin penalty spot a kawk nghal chat.
Correa hian a penalty hlawhchhuah chu petin goal-ah erawh a chantir thei lova, Leicester City goalkeeper Kasper Schmeichel-a dinglam lei hrulah petin Schmeichel hian a man chiang hle. He inkhelah hian Peter Schmeichel-a fapa hi a chetha hle a, vawi duailo a team-te a chhanhim a ni. Correa-a'n penalty a hlah hnuah Sevilla goal bawh a na sawt emaw tihtur a ni a, minute 25-naah goal an thun ta nge nge.
Sevilla full-back kheltha tak Escudero Palomo chuan khelmual veilam atangin ball a cross a, he ball hi far-post a awm Sarabia chuan mawi takin a head goal. Sarabia hian Schmeichel-a dinglamah a head a, Leicester goalkeeper hi a bum chian em avangin a che hmanlo. Goal ropui tak a ni. Hemi hnu lawk hian Sevilla goal khatna siamsaktu Escudero Palomo chuan 18 yard vel atangin a hlap a, Schmeichel hian a dang tha hle.
Sevilla lamin inkhel an thunun zui zel a, Jovetic-a'n 40 yard vel atanga a shot chu Schmeichel-a'n a dang tha hle. Sevilla tan Vitolo a hmuhnawm a, a chance tha a hmang tangkai theilo erawh a vanduai tak zet. N'Zonzi a kheltha viau bawk a, a huntha neih erawh a hmang tangkai thei biklo. First half-ah goal a luh belh tawh lova, hun a tawp zui.
Second half tantirah Sevilla bawkin bul an tan tha a, inkhel an thunun chhunzawm. Tan atanga minute 10-naah Sevilla defender Clement Lenglet chu a inhliam avangin lakchhuah a ni a, Daniel Carrico dah luh a ni. Leicester pawhin substitution siamin minute 58-naah Gray chuan Musa a rawn thlak ve bawk. Leicester game-in tlemin hma a sawn a, ball chang tam ve tan chiah mahse goal an chhuah lehnghal. Minute 62-naah first half-a penalty hlahtu Joaquin Correa chuan Sevilla goal hnihna a thun a ni.
Stevan Jovetić chuan buai nuaih nuaih karah cool takin ball a la a, lei a thlen veleh nalh takin Correa tan a kheng phei zeuh a, vengtu nei lova awm Argentine attactker hian a pet goal chiang hle. Leicester hian goal hnih an chhuahna kawngah an defender ten an tihtur an tlinlo niin a lang a, Jovetic an veng hneh lo leh Correa an veng miahlo kha an tihsual lian tak a ni. Tin, first half a goal an chhuah danah Christian Fuchs-a'n a hna a tlinlo hle bawk.
Leicester-in goal hnih an chhuah hnuah an tang sawt tih a hriat a, game-ah pawh hmasawnna hmuhtur a awm. A hma aiin ball an chang tam a, an taima sawt bawk. Inkhel pumpui thlirin Leicester hian hnehlo zawk mahse an phu ang ngeiin goal khat erawh an thun hram a, away-ah goal khat an neih hian second leg inkhelh a nih leh hunah an tangkai pui viauiin a rinawm.
Sevilla-in an goal hnihna an thun atanga minute 10-naah Leicester chuan Vardy hmangin goal an thun a, Danny Drinkwater-a'n khelmual veilamah ball a tlanpui hnuah Sevilla penalty box pawn atangin ball tha tak a cross a, Vardy chuan minute 72-naah a pet goal chiang hle. Sevilla lamin inkhel thunun chhunzawm mahse Leicester City-in counter attack hmangin a khat tawkin an rum thaih ve reng a, inkhelah team pahnih dinhmun inthlau viau mahse inkhel erawh a hmuhnawm hle.
England International Jamie Vardy-a'n a vawikhatna atan Champions League-ah goal a thun a, a lawmpui awm hle. Chu aimaha lawmawm zawk chu Leicester hian a zawnin game 6 lai goal an thun tawh lova, Sevilla lamah goal an thun leh ta hi team pumpui tan hmasawnna a nih ngei a rinawm.
Sevilla tan Nasri leh N'Zonzi-te an kheltha tak zet a, Sevilla team khai dingtu an ni. Steven N'Zonzi (98) leh Samir Nasri (95) pass dik zat belhkhawm hi 193 lai a ni a, Leicester team pumpui pass dik zat (156) belhkhawm aiin Nasri leh N'Zonzi-te pass dik zat hi a tam zawk a ni.
Steven N'Zonzi stat:
107 passes
100% take-ons
4 chances created
4 aerial duels won
2 tackles won
2 interceptions
Sevilla hian 2-1 in hma hruai mahse chak chiang zawk an la awm lova, second leg hi King Power Stadium-a khelh leh tur a ni a, engpawh thleng thei a ni a, sawilawk theih a nilo. Second leg inkhel a nghahhlel awm tawh a, tunge tlang zawk dawn tih hriat a chakawm tawh hle mai.