08 Apr 2017 08:41

inkhel

​Sevilla hlawhtlinna phena mi pawimawh Monchi

Ramón Rodríguez Verdejo, Monchi tia hriat lar zawk hi Sevilla goalkeeper hlui a ni a, a career pum Sevilla tan a khel a ni. Footballer a nihna angin sulhnu ropui hnutchhiah lem lo mahse, football a chawlhsan hnua Sevilla tana a hnathawh erawh sawi nep tum mah ila thil theih a ni lo.

Kum 2000 khan Sevilla sporting director hna a chelh tan a, hetih hunlai hi Sevilla buai zual hunlai ber tih theih a ni a, kum 2 chhungin club president 5 lai an nei hman a ni. Monchi-a'n club hriat hlawh lem lo tak Sevilla chu La Liga a kaipui nghal a, sum hman tur nei tam lo mahse player lei thiam bik tia hriat reng a ni tawh ang.

Monchi hian sporting director a nih atangin Sevilla tan player a zawng khawm tan a, Dani Alves, Ivan Rakitic-te ho football khawvela phochhuaktu a ni. Sporting director a nih hnuah Sevilla hian Europa League nomawi 5 mai bakah Copa del Rey title 2 an chawi tawh a, La Liga-a talbuai thin kha Monchi awm hnuah chuan seaon tin 10-na aia sangah a awm ziah a ni. Monchi hian kum 17 zet a chenchilh tawh Sevilla chu season tawpa a chhuahsan tur thu a sawi chiang tawh a, Sevilla siam liantu tih theih Monchi-a player lei fuh zual thenkhat chauh tarlang ila.

* Dani Alves: Signed from: Bahia (2002)

Fee: £413,000

Sold to: Barcelona (2008)

Fee: £26.63m

Dani Alves thiamzia leh thatzia sawi nawn a ngai lo, nimahsela Alves thatzia hre hmasatu erawh Monchi hi a ni. Kum 19 lek a nihin loan hmangin an lalut a, a hnu lawkah a nghetin an lalut nghal a ni. Sevilla tan Europa League 2 leh Copa del Rey 1 a chawi a, Barcelona a pan hnua a sulhnu erawh ziah vek sen a ni lo.

* Julio Baptista: Signed from: São Paulo (2003)

Fee: £2.63m

Sold to: Real Madrid (2005)

Fee: £15m

Arsenal tan pawh a khel i hmu tawh ngei ang, kum 2003 khan Sau Paulo atangin 2.63m lekin Sevilla a zawm a, season hnih a cham chhungin goal 47 zet a khung a, Real hnena an hralh meuh a chuan an leina man let 7 vel zetin an hralh a ni.

* Adriano: Signed from: Coritiba (2004)

Fee: £1.88m

Sold to: Barcelona (2010)

Fee: £7.13m

Monchi-a'n sum hman tur a nei tam lo tih a hrechiang a, footballer la tha tur leh man tlawm taka lei theihna Brazil lamah hun a hmang hnem hle. Adriano hian Sevilla tan season ruk a khelh hnuah Barcelona-in a zawm a, Sevilla left-back rinawl a ni rei hle.

* Federico Fazio: Signed from: Ferro Carril (2006)

Fee: £600,000

Sold to: Tottenham Hotspur (2014)

Fee: £7.50m

Monchi-a'n £600,000 lekin Fazio hi a lei a, Sevilla captain hial niin Europa League 2, UEFA Super Cup 1 leh Copa Del Rey a chawi hnuin Tottenham a zawm a ni. Fazio man atang hian £6.9m lai an hlep a, England lamah Fazio che tha zui lo mahse Sevilla hlawkna a kiam phah lo.

* Christian Poulsen: Signed from: Schalke 04 (2006)

Fee: Free

Sold to: Juventus (2008)

Fee: £7.31m

Sevilla-in an player tha dangte an hum thei lo ang bawkin Poulsen pawh Juventus lamah an hralh a ngai a, a thlawna an lakluh kha £7.31m zetin an hralh a ni. Poulsen pawh hian Sevilla tan Europa League title pakhat a hlawhchhuak hman tho a ni.

* Seydou Keita: Signed from: Lens (2007)

Fee: £3m

Sold to: Barcelona (2008)

Fee: £10.5m

* Alvaro Negredo: Signed from: Real Madrid (2009)

Fee: £11.75m

Sold to: Manchester City (2013)

Fee: £18.75m

Real Madrid tan khel phak lo mahse Sevilla tan Negredo hlutna a hniam phah chuang lo. Sevillistas Los Blanquirrojos tan game 139 khelin goal 70 a khung sak hman a, Manchester City lama an chhuahtir leh nge nge a ni.

* Gary Medel: Signed from: Universidad Católica (2011)

Fee: £2.25m

Sold to: Cardiff City (2013)

Fee: £9.75m

* Ivan Rakitic: Signed from: Schalke (2010)

Fee: £1.88m

Sold to: Barcelona (2014)

Fee: £13.5m

Poulsen ang thoin Rakitic-a'n Schalke atangin Sevilla a pan a, Spain a pan hnuah Rakitic thatzia football khawvelin a hre chho tan a ni. Sevilla player pawimawh ber pawl a nih chho a, a thatna hmuh hmaih lotu Barcelona chuan Sevilla player duhlai an chhusak leh a ni. Rakitic manah pawh hian hlep an nei tha leh hle.

* Martin Caceres: Signed from: Barcelona (2011)

Fee: £2.25m

Sold to: Juventus (2012)

Fee: £6m

Monchi-a'n Barcelona tana khel phak lo Caceres a lalut a, Uruguayan defender hi Sevilla tan a khel tha tan dawn chiah tihin Italian club lian Juventus an lo lang a, Sevilla a chhuahsan leh nghal a ni.

* Geoffrey Kondogbia: Signed from: Lens (2012)

Fee: £3m

Sold to: Monaco (2013)

Fee: £15m

* Carlos Bacca: Signed from: Club Brugge (2013)

Fee: £5.25m

Sold to: Milan (2015)

Fee: £22.5m

Sevilla tan a season khatnaah league goal 21 a khung nghal a, a season hnihnaah goal 28 a khung leh nghal bawk. Monchi-a'n Belgium lam atanga a sengluh Colombian striker hian Sevilla tan Europa League title pahnih a hlawhchhuak hman a, Monchi awm lo se Bacca hi kan hre kher ang em?

* Aleix Vidal: Signed from: Almeria (2014)

Fee: £2.25m

Sold to: Barcelona (2015)

Fee: £12.75m

Barcelona-in an tih fo thin angin Sevilla chher hriam sa an chhuhsak leh a, season khat tha bak Sevilla tan khel lo mahse Europea League 1 a chawi hman tho a ni.

A chunga player kan tarlan atanga Sevilla sum hman dan leh hlawkna an tel tarlang nghal ila:

* Total spent – £36,353,000

* Total received – £172,320,000

* Profit – £135,967,000