​Serchhipah MFA Cup khelh tan a ni

15th March 2016, 02:03AM

Mizoram District hrang hrangte football-a inelna sangber, MFA CUP chu vawiin khan New Serchhip-a Khawtetlang Field-ah khelh tan a ni.

MFA Cup hi Serchhip Bawrhsap, Dr. Lalrozama, IAS-in a hawng a, hawnna inkhawm hi Pu Zolianmawia, Vice President-in kaihruaiin Serchhip bawrhsap chuan Mizorama Football inelna sang a thleng thei chu lawmawm a tih thu a sawi a, infiammi kalkhawmte chu theihtawp chhuah tura fuihin in unauna tha tak nei tura infiamna hmachhawn turin a chah.

He hunah hian Mizoram Football Assoctiation aiawhin, Pu C. Vanlalmawia, Joint Secretary-in thu a sawi a. Sairang-ah Mizoram tan Football Academy siam tura hmalak mek a nih thu sawiin FIFA atangin phul lem phah tur dawn anih thu a sawi bawk.

MFA Cup-ah hian Mizoram chhunga District 8-te an tel thei vek a, vawiin khan Group A te'n an group match hmasa ber an khel a, inkhel hmasa berah Champhai chuan 4-2 in Mamit an hneh a, Champhai leh Mamit te inkhelah hian First Half-ah goal alut lova, second half minute 69-naah Mamit lamin goal khung hmasain Mamit tan hian C. Zahmingthanga’n goal a khung a, minute 71-naah Davis Zomuanpuia’n mamit goal hnihna hi a khung ve leh nghal.

Minute 75-naah Lalruatsanga’n Champhai goal khatna a khung a, minute 76-naah Zonunsanga Hmar-in Champhai goal hnihna khung ve lehin goal hnih ve ve an khung tihah hun a tawp.

Boruak sang tak hnuaiah innnawr chhunzawm zelin minute 85-naah Champhai leh Mamit player pakhat ve ve, Vanlaltanpuia, Champhai leh Lalchhandama, Mamit ten Direct red card an hmu ve ve.

Hun pek belh minute 92-naah John Lalnunmawia’n Champhai goal thumna khung lehin minute 93-naah Lalhmachhuana’n Champhai goal 4-na a khung leh a. Hun tawp chhunzawmin Champhai hi 4-2 in an chak ta a ni.

Inkhel hnuhnung zawkah Serchhip leh Lunglei te inkhelin goal awm lovin an innehtawk.

Naktuk hian Group B ten an match hmasa ber an khel ang a, chawhnu dar 12:30-ah Aizawl leh Lawngtlai te an inkhel ang a, chawhnu dar 2:30-ah Saiha leh Kolasib te an inkhel ang.

MFA Cup hi a hun ngaiah an inkhel ziah dawn a ni.

Match 1 - GROUP A

Champhai 4 - 2 Mamit

(Lalruatsang 75', Zonunsanga Hmar 76', John Lalnunmawia 92', Lalhmachhuana 93') (C. Zahmingthanga 69', Davis Zomuanpuia 71')

Red cards - Vanlaltanpuia 85' (Champhai), Lalchhandama 85' (Mamit)

Match 2 - GROUP A

Lunglei 0-0 Serchhip

Match 3 - GROUP B

12:30 PM - Aizawl vs Lawngtlai

02:30 PM - Saiha vs Kolasib

Credit : Zara Pachuau

Copyright © inkhel.com 2024. All rights reserved.