September thlaah Amir Khan leh Samuel Vargas

29th June 2018, 03:06AM

Amir Khan chuan boxing ring a luhchilh leh dawn a, September 8 khian Colombian boxer Samuel Vargas nen an inhnek ang.

Kum hnih vel zet boxing a chawlhsan hnuah Amir Khan hi kuminah a rawn inlar leh a, April 21 khan Phil Lo Greco nen an inhnek a, Liverpool khawpuiah Amir Khan hian awlsam deuhin Canadian boxer hi a hneh a. Samuel Vargas nen an inhmachhawn tur hi kumina a vawi hnih inhnekna a ni ang.

Khan leh Vargas te hi Birmingham Arena-ah an inhnek dawn a, May 2016 a Saul ‘Canelo’ Alvarez-a’n a knock out hnua a vawi hnih inhnekna tur a ni leh chiah dawn a. Light-welterweight champion hlui hian a theih anga tam inhnek leh a tum thu a sawi.

Amir Khan chuan, “Kumina ka thil tum lian berte zinga mi chu a tam thei ang ber inhnek a ni a, Samuel Vargas nen kan inhnek thei tur hi lawmawm ka ti tak zet a. Ka beisei aia hmain boxing ring ka luhchilh leh thei dawn a, lawmawm ka ti hle a ni,” a ti.

“Vargas hi tawh khirh zet mai a ni a, boxer tha em em mai, welterweight star tha tak tak, Danny Garcia leh Errol Spence Jr te nen pawh lo tal ho tawh an ni a, hmachhawn a hautak viau dawn a. Vargas hi hneh phawt a, chumi hnuah a aia chona lian hmachhawn zel hi ka duhthusam a ni,” a ti bawk.

A sawi zelnaah, “September thlaa Vargas nen kan inhnek tur hi ka ti mai mai dawn hauh lo a, theihtawp ka chhuah ang a, ani pawhin chak ngei tumin a rawn thawk dawn tih a hriat a. Birmingham khawpuiah fans te tan ennawm tha tak awmtir ngei ka duh a, en loh phal chi a ni lo ang,” a ti a ni.

Colombian boxer Vargas hi vawi 33 a inhnek tawhah vawi 29 ngawt mai a chak a, Amir Khan nena inhnek chu a chak tawh thu a sawi.

“Amir Khan nen ring chhunga inhmachhawn chu ka chak tawh khawp mai a. Ka promoter Lee Baxter leh Matchroom Boxing mi leh sa Eddie Hearn te’n hetiang hun a awm theihna tura hma an la hi a lawmawm ka ti hle a, ka phur nghal viau a. Amir hmachhawn tur hian inpuahchahna hun pawh ka nei hnem dawn hle a, Samuel Vargas in hmuh tawh zawng zawngah chuan a tha ber in hmu ngei ang,” tiin Samuel Vargas chuan a sawi.

“Lo chhinchhiah tlat ula, Phil Lo Greco nen khan khaw khat chhuak, ram khat chhuak ni mah ila inanna pakhat mah kan nei lo a. Kei chuan Amir Khan hi hun khirh tak ka hmachhawn tir dawn a ni,” a ti bawk.

Copyright © inkhel.com 2024. All rights reserved.