​September ni 23-ah khawvel a tawp dawn em?

20th September 2017, 08:09PM

Kum 2012 December ni 21 khan khawvel kha a tawp dawn kha a ni a, mahse an sawn leh a, September ni 23 2017-ah hei a tawp leh dawn chu a ni a, hemi chungchang hi tunlai titi a nih avangin inkhel.com member te bengvar nan tarlang ve hrim hrim teh ang.

September ni 23, 2017-ah enge thleng dawn?

Thupuan 12:1,2 in a sawi nia ngaih theih tur vanah a rawn lang dawn, Sun, Mercury, Mars, Venus leh Jupiter te chu line khatah an awm anga, Virgo chungah Leo a awm bawk ang. Thla (Moon) chu a mawng lamah a awm bawk anga. Hetianga heng arsi bawr awmkhawm hi kum 7000 dana thleng nia chhut a ni. Kar 42 lai Jupiter chu Virgo pumchhung nia ngaiha a awm hnuah September ni 23 hian a chhuak chiah dawn. Hei nen hian Thupuan bung 12-na hi a inmil dawn hle.

"Vânah chhinchhiahna thil mak tak, hmeichhia - nî-a inthuam, a ke hnuaia thla awm, arsi sâwm leh pahnih chuang chawimawina lukhum khum a lo lang a. Nau a pai a, a vei a, a rûm a rûm a." Thupuan 12: 1,2.

Tin, August ni 21, 2017 khan America ramah ni awklem a thleng a, khami atanga ni 33 naah chiah he thil hi a thlen dawn avangin ngaihven a hlawh zual a, Isua kha kum 33 a dam nia sawi a ni a, Pathian sawina pakhat Elohim tih hi Bible-ah vawi 33 a lang bawk nen, Ni awklem atanga ni 33 na chiaha he thil thleng tur hi eng eng emaw nena hmehbel a ni chhunzawm ta a ni.

Vanah Pathianin chhinchhiahna a dah em ni?

Kan sawi tak tak hmain Bible keu leh hmasa lawk ila. Vanah Pathianin chhinchhiahna a dah em ni? Bible atangin chhanna tam tak a awm thei awm e. A hmasain Luka ziak ami chang khat hi thur chhuak lawk ila, “Tin, ni-ah te, thlaah te, arsi-ah te khian chhinchhiahna mak tak tak a lo awm ang a," Luka 21:25

Zawlneite khan thil lo thleng tur tam tak an sawi lawk zingah vana chhinchhiahna hmangin an sawi thin a nih kha. Genesis-ah pawh vanah chhinchhiahna Pathianin a dah thu a sawi nghe nghe. Hei hi Judate phei chuan vawiin thlengin an la chhut a, keini kristian te erawh chuan kan ngaihven ve lem lo.

Matthaia 8:11-13 ah khan Farisai leh Sadukaite khan Isua hnenah khan Amah fiahna atan vana chhinchhiahna an dil a nih kha. Khami tum khan Isua chuan, "Tûnlai mi, mi sual tak leh uire hmang takte hian chhinchhiahna thil mak an zawng ṭhîn a; nimahsela, Jona chhinchhiahna chauh lo chu chhinchhiahna thil mak rêng entîr an ni lo vang,” a ti a.

Enge chhinchhiahna nge Isuan a sawi chu? Jona hun laia chhinchhiahna a sawi chu enge ni ta ang?

Nghapuiin a dawlh Jona chanchinah khan ni awklem chungchang hian awmzia thuk tak a nei nia sawi a ni thin. Jona'n Ninevi khuaah chanchintha a hril hma chiah khan Ni awklem a thleng nia sawi a ni a. Bible-ah hemi chungchang hi ziak lo mahse lehkhabu tam takah ni awklem avanga chhiatna an pumpelh chungchang ziahlan a ni hlawm.

Ninevi kha vawiinah chuan Mosul tih a ni a, Ashur-Dan III lal lai, June ni 15, 763 BC khan total solar eclipse a thleng. Bible-ah heng zawng zawng hi inziak lo mahse Mosul lehkhabu hluiah a chuang kalh a, ni awklem thlen hnu khan an khaw pum inchhirin Pathian lam an hawi thu ziahlan a ni bawk. History chhui tute pawhin an sawi danin khami tuma ni awklem kha History-a ni awklem hriatreng tawh tur a nih thu an sawi nghe nghe.

Ni awklem hi kan hmu ve nual tawh anga, a lem pum tak erawh hmu kan la tam kher lo maithei. Thla (Moon)-in a hliah tih kan hre chung hian mahniah hian engemaw riau hi a awm tlat a ni. Hmanlai phei kha chuan ni awklem hi engtin nge a thlen tih an la hriat hma kha chuan a mak dangdai tur zia mai chu. Khatiang khawpa misual khua nisi, ni khat leka an han sim vek thei kha sign an hmuh vang niin Bible zirtute chuan an ngai hlawm. Lal Isua sawi chhinchhiahna chu Ni awklem kha a ni thei angem? A nih a rinawm tak em emna chhan chu a thihni-ah khan chu chhinchhiahna ngei chu vanah a rawn lang ve leh chiah mai le.

Isua khenbeh a nih pawh khan khua a thim a, lir a nghing bawk.

Farisai ten an dil ang chiah chuan Isua khenbeh a nih niah chuan ni a thim ta a. Ziak hrang hrangah khawvel thim chhung hi a inang lova, a thenin darkar thum vel an ti a, a thenin darkar 6 vel an tih laiin ziak dangah phei chuan darkar 9 vel tih a ni hial.

Matthaia ziak hi ring dawn ta ila, "Dâr sâwm leh pahnih aṭanga tlai dâr thum thlengin khawvêl pum pui a thim ta vek a. Tlai dâr thum vêlah chuan Isua chu ring takin a au chhuak a, “Eli, Eli, lema sabakthani” a ti a; chu chu, ‘Ka Pathian, ka Pathian, engah nge mi kalsan?” tihna a ni. Matthaia 27:45-46.

Isua khenbeh a nih lai khan ni awklem a awm ngei nia hriat a ni. NASA-in ni leh thla awklem an chhinchhiahna kan keu chuan, AD 33 April ni 3 khan ni awklem a thleng, Israel ram atanga lang thei niin, chawhnu herah a thleng a, Ni awklem hi a rei berah minute 7 emaw vel lek a ni thin a, hetih lai hian AD 33-a thleng erawh darkar 2 leh minute 50 lai a ni.

Engpawh nise thil chiang tak lang thei ta chu, ni leh thla leh arsi te hi Pathian chuan hun chhinchhiah nan min hman tir a, chu chu Juda te chuan an ngaihven hle. Farisai te hnena Isuan chhinchhiahna a sawi kha ni awklem hi a nih ngei a rinawm tlat a ni.

Total Solar Eclipse a thlen tum hian thil lian tham khawvelah a thleng nual thin, lir te a nghing a, revolution te a chhuak a, indopui te pawh a chhuak thin bawk. Hetih lai hian thil thleng lian tham sawi tur a awm loh kumte pawh a awm ve bawk.

Kumin hi engatinge an ngaihven em em?

August ni 21-a America rama ni awklem a lan atanga ni 33 na chiah, September ni 23 hian ngaihven a hlawh ta em em. Ni awklem zawh chiah khan Jerusalem atang chuan tlai dar 7:16 PM a ni chiah a, ni a tla chiah bawk. Khata tang khan Juda te chuan Rosh Chodesh Elul an hmang tan. 'ELUL' chu 'Harvest' tihna a ni a, Harvest hrilhfiahna hrang hrang chu, Thlai thar seng khawm, seng khawm, man khawm, tiin kan sawi thei awm e.

Elul 2017 hi Hebrai te kum 5777 -na thla hnuhnung ber a ni a, kum 2017 leh 5777 hi Hebrai te chuan hrilhlawkna nen an hmeh bel mawi em em a, (Keini Kristiante erawh chuan kan ngai thutak lem lo).

Kum 800 liamta khan Rabbi pakhat Judah ben Samuel chuan hrilhlawkna a nei a, Rabbi Meir Halevi Horowitz pawhin kum 2017 hrilhlawkna a nei ve bawk. (Hemi chungchang hi comment kan nei lawk anga, keini Kristian te chuan kan ring lem lo)

Hetih lai hian thil pakhat chu Thupuan bung 12 hrilhlawkna kha September thla hian a rawn thleng dawn niin heng Rabbi te hian an sawi. Elul hi Hebrai kum 5777 thla tawpna ber a nih chuan September thla hian kum 5778 kum thar a intan dawn tihna a ni a, America rama solar eclipse a thlen atanga ni 33 na chiahah (Chu chu September ni 23) ni leh thla leh arsi bawrkhawmah chhinchhiahna a lang dawn ta a ni.

September ni 23 leh Nibiru an hmehbel ta

September ni 23 hi an duh dan danin eng eng emaw nen an hmehbel chho ta a, thenkhat chuan mithianghlim lawr a awm dawn te an ti, thenkhat chuan khawvela a tawp dawn te an ti, thenkhat chuan tawpna intanna chhinchhiahna a ni an ti bawk. Tichuan Nibiru awm ringte chuan Nibiru a rawn lang dawn an ti bawk. Tumah hma hun hre lawk kan lawm lo, rinthu vek a ni tih erawh kan hriat hmasak a tul.

Nibiru hi kum 1995 atang vela rawn irhchhuak a ni a, hmeichhe pakhat Nancy Lieder chuan khawvel dang atanga thuthawn dawng niin a insawi, "Nibiru a rawn lang anga, chu chuan nasa takin khawvelah chhiatna a thlen ang, mihring tam tak an thi bawk dawn a ni," tia a sawi chu ZetaTalk-ah a tarlang.

Nancy Lieder hian Nibiru planet chu khawvel let li vela lian a ni a, kum 2003 May ni 27-ah a rawn lang dawn a ti, mahse chu planet chu a BIRU a niang, a rawn lang lo hlauh. Tichuan kum 2012-ah khan an sawn leh a, a la rawn lang lo cheu, kum 2017 September ni 23-ah an sawn leh ta a ni.

Nancy Lieder thusawi mai bakah hian Ancient Astronaut writer Zecharia Sitchin chuan Nibiru chungchang hi a vawrh lar hle a, Zecharia hian Babylonian leh Sumerian mythology te atanga rin dan chu a rawn thar thawh leh a, Babylonian leh Sumerian te khan Planet 9 a awm niin an tarlang a, tunah hi chuan Planet kan hriat theih chin chu 8 an ni a (Pluto erawh ni a helna kawngah rilru a pek tawk lo nia a lan avangin planet atangin an telh ta lova... haha.. Tak takin...A tet em avangin planet zinga chhiar tel a ni tawh lo). Planet 9-na (Planet X, Nibiru) hian kum 15000 atanga kum 2000 chhung emaw velin ni a hel chhuak nia sawi a ni.

Khawvel hnaiha a lo kal leh chuan nasa takin khawvel a suamsam dawn nia rin a ni a, a hipna a nasat em avangin khawvelah physical pole shift (Khawvel letling thawk) a thleng dawn niin an ngai. Chu chuan lirnghing nasa tak leh tuifawn nasa tak a thlen dawn niin an ngai bawk a ni.

Planet 9 chu a awm tak tak em?

Nibiru theory hi scientific community chuan an hnawl chiang hle a, finfiahna awm tak tak lo, chhui dawnna leh rinthu mai mai niin an ngai. Hetih lai hian kum 2016 kum tir lamah khan California Institute of technology (Caltech) chuan planet ten ni kan hel dan an zirchiannaah planet ten Sun an helna kawng hi a tei (Perfect Circle lo) tih an hmuchhuak. Planet dang zawng zawng lo buk (Balance) tu Earth let 20 vela lian planet pakhat chu a la awm an ring. He an thil hmuhchhuah hian Nibiru theory ringtute a tiphur hle nghe nghe a ni.

Mr. Brown, Professor of Planetary Astronomy chuan, "Planet 9-na hi a awm thei dawn tlatin kan hria. Hmanlaia an lo hmuhchhuah bak planet pahnih tunlai khawvelah kan hmuchhuak chauh a ni a, he thil hi pathumna a nih kan beisei. Hetianga kan solar system nghawng mektu hi thil lian tak a la awm niin a lang a, chu chu kan hmuhchhuah hmabak a ni," tiin a sawi nghe nghe.

Planet 9 chu engatinge kan hmuh theih loh?

Kan solar system pawn lamah hian vur leh lungnawi tam leh chhah takin Ni hi a hel ve mek a, chu chu Kuper belt tih a ni. Hei hian hemi pawna planet dang a lo awm a nih chuan a hliah a nih a rinawm. Van thengreng hla tak taka arsi te telescope tha tak tak hmanga an hmuh theih laia kan solar system-a planet awm pawh ka la chiang lo hian zawhna a ti tam hle.

Galaxy leh arsi te chuan enna an nei, eng (light) in kan khawvel a rawn thlen/sut atangin kan telescope te hian hmun hla tak tak an hmu thei. Hetih lai hian planet chuan amahin enna a nei si lova, Ni hlat taka a awm a nih chuan hmuh mai theih a ni lo bawk a ni.

A ziaktu Comment : Hrilhlawkna tam tak a awm, thenkhat chuan thil lo thleng tur te nen an hmehbel zung zung bawk a, khawvel tawp hun pawh hi an ring dik lo thin khawp mai. Tun hnai thil lo thleng tur leh hrilhlawkna nena an hmeh bel chungchangah hian 'ka ring e, ring lo e' tih sawi theih ka nei lo. Hemi chungchang ka rawn thur chhuah nachhan ber chu, tunlai titi a ni a, kan ngaihtuahna ti zau atan a nih bakah engtik lai pawha chhiatna emaw Pathian hun ruat emaw tawng thei kan nih avangin mitin ten Pathian thuawih lamah tan i la zual ang ka ti ve mai mai a nih chu.

September ni 23 hian Nibiru a rawn lan pawh ka ring chuang lo, a lo hnaih tawh phei chuan hmuh a hun daih tawh ang mawle, a rawn lan phawt loh chuan ka awih lo tih ang vel a la ni rih e. Chutih laiin thil pakhat chu September ni 23-a vana arsi bawr rawn lang tur erawh Bible hrilhlawkna nen a inhmeh khawp mai a, Bible hrilhlawkna kha September ni 23 hi a nih chuan hei erawh hun hnuhnung intanna tur chhinchhiahna/hriattirna a nih erawh a rinawm hle a ni.

Copyright © inkhel.com 2024. All rights reserved.