14 Nov 2017 10:58

inkhel

Season tawpa chawl tur Drogba

Chelsea striker hlui Didier Drogba chuan season tawpah inkhelh chawlhsan a rilruk tih a sawi a, khelmual pawn lama ruahman a neihte tih a duh tawh.

Kum 39 mi ni tawh Drogba hian United Soccer League (USL) club Phoenix Rising tan a khel mek a, Phoenix hi April thla khan a zawm a game 14 khelin goal 10 a khungsak tawh.

RMC Sport-in an kawmnaah Drogba chuan, "Nakkum hi ka season hnuhnung ber a ni tawhin ka ring. Engemaw vanga tawp a ngai ve țhin."

"Ka ruahman neihte tan hun neih ve ka ngai a inkhelh zel pawh ala nuam. Mahse kum 39 ka ni tawh a ka zam a țha tawh lo." tiin a sawi.

Ivory Coast tana goal khung hnem ber ni mek hian țum hnih Chelsea a zawm a, a hun hmasa lamah The Blues hi kum riat chenchilhin Premier League nomawi vawithum a chawipui a, FA Cup vawi li chawipui bawkin League Cup-ah vawithum a champion pui bakah Champions League nomawi a chawipui bawk.

London club hi kum 2012 May thla khan chhuahsanin Chinese club Shanghai Shenhua a zawm a, kum khat chhung chauh hun a hman hnuin kum 2013 January thla khan Galatasaray-in an lalut.

Turkish club-ah hian season khat chauh tho hmang lehin Turkish Super Lig leh Turkish Super Cup-ah a champion hman tho va, kum 2014 July khan Chelsea-ah kir lehin Premier League leh League Cup-ah vawikhat a champion pui leh bawk.

African Footballer of the Year-a vawihnih an thlan tawh Drogba hian kum 2015 July thla khan United States lam panin Major League Soccer (MLS) club Montreal Impact a zawm leh a, Montreal tan hian MLS-ah game 33 khelin goal 21 a khung.

Thla li chhung club nei lova a awm hnuin kumin April thla khan Pheonix Rising-in an lalut a tun thlengin US lamah hian ala awm ta zel.

Țum hnih lai Premier League Golden Boot dawng tawh Drogba hian a hun pumah belhkhawmin game 677 a khel tawh a goal 296 a khung tawh bawk a ni.