Chelsea manager Antonio Conte chuan Chelsea hian tun thlengin season hmasa a an chet chhiatna chu player-te rilruah a la awm a, club-in a la tuar tih a sawi.

Chelsea hian manager thar Conte hnuaiah season bul tan tha mahse, tun hnaiah result duh ang an hmu theilo a. Conte ngei pawhin a player te an huai tawklo tiin a lo sawi tawh a nih kha. He an harsatna tawh chhan ber hi season hmasaa an chet chhiatna kha an rilrua a la awm reng vang niin Conte hian a sawi.

Chelsea hian 2014/15 season khan Jose Mourinho-a hnuaiah season duhawm tak an hmang a, Premier League-ah an champion a nih kha. Season lehah beisei loh tak maiin an tawlh thlu a, relegation battle an fight titih hial, a tawpah erawh 10-naah an awm thei hram thung. Tun season Europe inelna an chan a, manager thar nen beiseina tharin khel leh thei turin an bei mek.

Conte chuan, "Hetiang season, season chhe tak, 10-na kan nih ang hi a thleng a nih chuan player-te rilruah thil enge maw a la cham thin. Hei hi thil pangai a ni." tiin a sawi a.

Sawi chhunzawm lehin, "An mahniah, an rilruah a la cham reng a. Hetiang dinhmunah hi chuan inrintawkna pawh an tlachham thin. Hetiang a nih avang hian ka sawi nawn leh duh chu, tun season hi Chelsea tan a pawimawh hle a ni."

"A harsat chhan dang pakhat leh chu season hmasaa thil thleng kha i thlak danglam a ngai a, chu chu a awlsam lo a ni. Kan thlak danglam theihna kawng awmchhun chu player-te leh, club leh fans-te nen theihtawp chhuah a beih a ni. Season chhe tak liam tawh hnu chu sut ngaihna a awm tawh lo, season hmasa ang kha." tiin a sawi.

Chelsea hian thawhtan zana Anfield a Liverpool goal awm lova inhnehtawk puitu Manchester United an mikhual dawn a, Manchester United manager hi tu dang ni lovin 2014/15 a Chelsea champion pui a, season dawt leha chet chhiat puitu Mourinho a nih avangin tu tan pawh inkhel pawimawh tak a ni ngei ang.