Antonio Conte-a'n England-a a season khatnaah Premier League nomawi a chawi nghal ngei dawn niin a lang ta. Thawhleh zana Premier League inkhelah hmahruaitu Chelsea-in an khelmualah 4-2 in Southampton an hneh a, vawi khata khel tam chungin point 7 laiin hma an hruai fal leh tawh a ni.
Stamford Bridge-a inkhelah Blues tan Eden Hazard, Gary Cahill leh Diego Costa(2) te'n goal an khung a, Saints tan Chelsea player hlui pahnih Oriel Romeu leh Ryan Bertrand-te'n goal an khung ve bawk.
Chelsea 4-2 Southampton
(Hazard 5' Cahill 45' Costa 53' 89') (Romeu' 24' Bertrand 90')
PLAYER RATINGS:
Chelsea - Courtois 7, Azpilicueta 7, David Luiz 7, Cahill 8, Moses 7, Kante 8, Matic 7, Alonso 7, Fabregas 8, Diego Costa 8, Hazard 9.
Subs - Begovic, Ake, Terry 6, Chalobah, Willian 6, Pedro 6, Batshuayi.
Southampton - Forster 7, Cedric 7, Stephens 7, Yoshida 6, Bertrand 7, Romeu 7, Davis 7, Ward-Prowse 7, Tadic 7, Boufal 7, Gabbiadini 7.
Subs - Hassen, Clasie, Long 6, Rodriguez 6, Cacares, Redmond 6, Hojbjerg.
He inkhela goal hmasa ber hi minute 5-naa lut a ni a, mual dinglam atanga Costa siamsak chu Hazard chuan angle chep tak karah box chhung atangin a pet lut. Saints player paruk zet box chhungah awm mahse Hazard an dang thei lo a, Saints coach Clause Puel a lawm lo hle ang.
Darkar chanve an khel tling tep tihin Romeu chuan a club hlui lakah goal khungin Saints siphurh a rul a, kum 2015 hnua goal a khung lehna hmasa ber a ni. Minute 45 chhungin goal a luh belh tawh dawn lo nia a lan hnu first half added time-ah Cahill chuan Chelsea hmahruaina goal a tauh lut a, Conte naute'n chawlhlawkah goal khatin hma an hruai.
Second half tan a nih hnu lawkah Costa-a'n Chelsea goal thumna a khung chhunzawm ve nghal a, mual dinglam atanga Fabregas ball vawrh luh chu Spanish striker hian a tauh lut tha hle. Saints lamin an sipurh sutna hun tha nei mahse an chhawr tangkai zo lo. Courtois-a'n Tusan Tadic goal shot tha zetin a dansak a, Kante goal thun ngei tura ngaih chu Saints goalkeeper Forster-a'n a dansak ve bawk.
Minute 89-naah Chelsea-in team goal nalh zet an khung a, a hmawrbawktu chu Costa a ni. Costa hian mual veilamah ball a khalh a, Saints defender-te'n hual vel mahse Hazard leh Pedro-te nen rang takin anin one-two a, box chhunga ball a awm rualin Costa hian goal a pet lut nghal.
Bertrand-a'n Saints goal hnihna khung chhunzawm ve nghal mahse Chelsea chakna tur a dal zo lo a, Conte naute'n Stamford Bridge-ah point thum hlu tak an hlawhchhuak. Chelsea hian game nga khelh tur an la neihah Everton, Middlesbrough, Watford, West Brom leh Sunderland an la hmachhawn dawn a, an chesual fe a nih loh chuan Premier League champion a nih ngei a rinawm.