08 Nov 2016 11:06

Inkhel

Mizo Sports Website hmasa ber

​Rs. 500 leh Rs. 1000 note tih tawp tur chungchanga hriattur pawimawhte

India ram chhunga awm; uid hlau leh hlau lo zawng zawng, Football fans zawng zawngte thlenga mi nghawng thil a nih avangin inkhel.com chuan hemi chungchang hi member-te hriatah kan tarlang ve e.

November ni 8, 2016 (Thawhlehni) zan khan India Prime Minsiter Narendra Modi chuan Rs. 500 leh Rs. 1000 note tih tawp a nih tur thu a puang a, hemi chungchanga hriattur pawimawh thenkhatte:

1. November ni 9, 2016 (Nilaini) hian bank khar a ni dawn.(A thawkte chu an kal dawn, mipui dawr theih an ni dawn lo. ATM pawh a hman theih dawn loh) Pawisa note thar pekchhuah a nih dawn avangin bank a inbuatsaih dawn a, November ni 9, 2016 (Ningani) atangin Rs. 500 leh Rs. 1000 te chu bank-ah a deposit theih dawn.

2. November ni 10 atanga December ni 30, 2016 thleng bank leh post office-ah te Rs. 500 leh Rs. 1000 note te deposit/thleng theih a la ni dawn a. Ni khatah Rs. 10,000 chiah withdraw theih a ni dawn a, kar khat chhungin Rs. 20,000 chiah withdraw theih a ni dawn bawk. Withdraw theih zat hi tihpun chhoh zel a ni dawn tho a, pawisa thleng tumte chuan Aadhaar card emaw PAN Card emaw ken tur a ni dawn a, November ni 24 thleng pawisa thleng theih zat chu Rs. 4,000 a ni dawn a ni.

3. December ni 30 hnuah erawh RBI chuan he a chunga inkaihhruaina dan a siam hi a ti danglam tawh dawn a ni.

4. Zin mite chuan airport-ah pawisa an thleng thei ang.

5. November ni 11 thleng Sawrkar damdawi in chuan Rs. 500 leh Rs. 1000 note te a la pawm dawn bawk a ni.

6. November ni 11 thleng railway, bus leh thlawhna ticket lei nan Rs. 500 leh Rs. 1000 note pawm a ni ang a. Hetiang bawk hian petrol station (sawrkar enkawl) leh bawnghnute zuartute pawh hei hian a huam ang.

7. Online-a thil lei leh hralh chungchang chu a ngai angin a kal dawn thova, cash on delivery atan erawh Rs. 500 leh Rs. 1000 hman a rem tawh lovang.

8. India sawrkar chuan Rs. 500 note thar leh Rs. 2000 note a issue vat dawn a ni.

Enge a chhan ber?

Prime Minister Narendra Modi hian sawi lawk miah lova he thil a tih thut chhan chu pawisa lem leh sum chheprelh tam lutuk tih bo nan a ni a. Huaisen taka Pu Modi-a'n hetia hma a la hi a fakawm thlawt a ni.

Mipuite tan a buaithlak dawn khawp a, hun reilote chhung chu harsatna kan tawk ve nual dawn, mahse thil tha zawk a rawn chhuah phah ngei dawn a, chu erawh thil lawmawm tak a ni thung.

Awhna sualah tang suh ang che

Hmun dangah chuan income tax lak a ni a, an sum lakluhna a thianghlim leh thianghlim loh chhui chhuah theih a ni a, an sum lakluh dan azirin tax an chawi a ngai bawk. Mi hausa tam takin tax tam tak chawi an ui thin avangin sum tam tak a cash tein an lo chheprelh thin a. Tin, sum thianghlim lo hmanga sumdawngte pawhin bank-a deposit aiin a cash tein an kawl a, hetia Rs. 500 leh Rs. 1000 note tih thih a nih dawn takah chuan an buai dawn khawp a ni.

Mizoramah hian income tax lak a ni ve lova, state pawn atangin mi hausa tak takin kan account-a sum tam tak pek tiam chunga pawisa rawn dah tum an awm nawk maithei. Misualte lo thurualpui hi thil sual tak a ni a, khawngaihin inkhel.com member-te chuan ti lo hram ula kan ngen che u a ni. Tin, in account-ah sum tam tak a luh huk chuan awlsam taka chhui theih in ni thova. State pawn atanga deposit a nih bawk phei chuan chhui a awlsam leh zual dawn a. Chuvang chuan awhna suala tlahawlh lo turin kan inchah a ni.