December ni 1, 2016 khan Mahuma Memorial Cricket Tournament Round 4 match hnuhnung ber khelh a ni a, Champion lai Kulikawn Cricket Club chuan run 23-in Chhinga Veng Cricket Club an hneh.

Toss-a vannei zawk Kulikawn ten vuak hmasak an thlang a, captain Michael Lalremkima chu run 16 chiah a siam tihin Chhinga Veng (3C) captain William Pachuau chuan a vawm out. President's Cup Best Player Lalrinsanga phei chuan run 6 chiah a siam!

Wicket an hloh hma avangin Kulikawn an fimkhur hle a, run rate pawh a hniam khawp mai. Mahse Golu Vikash Kumar chuan run 30 a rawn vaw chhuak a, Parvez Ahmed (27 runs) in rawn thlawp tha chho ve viau bawk mahse Lalnuntluanga (11/3) leh Lalruatdika (13/2) te an vawm that avangin Kulikawnte hian over 38 ah run 129 siamin an out vek a, 3C chu target 130 an tuk sak ta a ni.

Chhinga Veng lamin target um nuam tak ni turin ngai mahse an beisei angin thil an kal lo. Abhay Joshi (30 runs) chuan thlawptu a hmu tha lo hle a, an State pawn player Saidul Barlaskar chuan run 14 rawn vaw chhuak ve bawk mahse Round hmasa lama che chhia Champion lai Kulikawn ten chak ngei ngei a tul a ni tih an hriat avangin an tang hle, Chhinga Veng an che hleithei ta lo.

Parvez Ahmed (19/2), Michael Lalremkima (25/2) leh Rosiamliana (20/2) te vawm that zar zovin Kulikawn te hian Chhinga Veng te hi over 27-ah run 106 chauh an siam tir a, an vawm out vek a, run 23 in Kulikawn CC an chak ta a ni.

Mahuma Memorial Cricket Tournament hi round a sang telh telh a, a ngaihnawm chho zel dawn niin a lang, vawi 4 vek an khel kual tawh a, Chanmarians ten hneh loh an la tawng lo, Chaltlang SC an la chaklo vek thung a, League hi Round 7 thleng khelh tur a nih avangin Round 5 na atang hi chuan tu nge Semi Final lut anga, tunge Relegate dawn? Tih a hriat chho tan tura beisei a ni.

2nd December 2016

Round 5 (9:15AM)

Chanmarians vs Chaltlang SC