Italian Valentino Rossi chuan Argentina MotoGP-a a tluk chhanah a tlanpui Marc Marquez chu a puh a - Marquez chuan amah [Rossi] chu intlansiak pui tak tak atan a hlau niin Rossi hian a sawi.

Argentina MotoGP-ah hian British Cal Crutchlow chu pakhatna a ni a, Rossi-a'n a tluk chhana a puh Spainish Marquez hi 18-na a ni thung.

Vawi 9 lai champion tawh Rossi - 19-naa zo - hian MotoGP champion lai hi puh/hek-in 'infiamna khawvel ti chhetu' ti hialin a sawi.

Hetihlai hian Marquez chuan Rossi-a sawi hi thu diklo anih thu a lo sawi ve mek bawk.

He intlansiak tan dawn khan ruah a sur nasa em em a, hun engemaw chen intihsiakna tih khawtlai a ni. Tan anih hian Hondo rider Marquez chu a hnampui Aleix Espargaro lakah harsatna a siam avangin penalty pek a ni a. Tum 4 champion tawh Marquez hi pit-ah tlan luh tir a ni a, a hnung atanga tlan tir leh a ni.

Rossi chuan an accident chungchang a sawi naah, "A [Marquez] tihpalh a ni lo a ni. A tih luih liau liau a ni. Hetiang thil i ti anih chuan kan intihsiakna level hi 'dangerous point' ah i dah a ni.

"Intlansiakna hmunah Marquez a awm ve chuan ka hlau hle thin," tiin a sawi.

Intlansiak zawh khan Marquez chuan Rossi hnenah ngaihdam dil a tum niin hmuh a ni a, amaherawhchu Movistar Yamaha staff te chuan an lo hnar a, Rossi hi a be ta lo.

Italian, kum 39 mi, Rossi thusawi chung chang an zawhnaah, Marquez chuan, "A thusawi duh danah ka lungawi lo takzet a ni.

"Ka career-ah hian rider dang tih tluk tumin ka tlan ngai lo a ni. Engtik lai pawhin pumpelh ka tum thin zawk," tiin Spanish chuan a sawi ve thung.

"Vawiinnia Valentino chunga thil thleng hi tihpalh liau liau a ni a. A track awm dan leh kan tlan dan a innan fuh em avangin vanduaina kha a thleng ta a ni. Keichuan hma lam ka en char char.

"A thusawi kha a dik lo hul hual a ni." tiin Marquez hian a sawi ve thung.

Rossi, 'MotoGP thuneitu te hnena Marquez hrem tura ti tu' chuan: " He thil thleng hi thil pawi tak a ni. A chhan chu he sport hi a tichhia a ni; A chhan chu a elpuite zahna chhete pawh a nei lo a ni. A nei lo!" tiin na takin a sawi.

2015 khan heng rider pahnih hi koh hran an lo nih tawh nghe kha - Malaysian Grand Prix October-ah Rossi chuan Marquez hi a bike atangin a lo tlawh a, hrem niin next race-ah a tawp lam atanga tan tura tih anih kha.