​Rosberg hmun ruak luahtu Mercedes driver thar Bottas

17th January 2017, 02:01AM

Valtteri Bottas chu 2017 Mercedes driver a ni dawn ta a, he Finn driver hian Williams atangin World Champion team hi a zawm ta a ni.

Nico Rosberg chuan World Champion a nih hnuah intlansiak a chawlhsan a, a hmun ruak luah tur hian Mercedes chuan driver an zawng char char a, Kum 27 mi Bottas chu Lewis Hamilton kawppui turin an tifel ta a ni.

2016 season zawh ruala chawl Brazilian Felipe Massa chuan a rilru thlakin F1 huangah a zuanglut leh a, Williams chuan an mamawh tawh lo nia a inhriat avangin chawlh a puang a nih kha, chutih laiin Williams hian Bottas an chan leh tak si avangin Massa chu a kir leh ta a ni.

"Massa-a'n a rilru thlaka kum 2017 chhunga kan tana tlan leh tura a lo kir leh hi ka lawm hle a ni," tiin Williams deputy chief Claire Williams chuan a sawi nghe nghe.

"Valterri hian Constructors' Champions ni lai zawm thei tur hian theihna a nei chiang a. Keini lam pawh Mercedes nen inremna nei thei turin tha kan thawh ve nasa bawk, Valterri-a'n hmabak eng tak a neih hmang tangkai tur hian kan pui nasa a ni.

"Valterri hi kum 2010 atang khan Williams chhungkua zing ami a ni tawh a. Podium-ah pawh vawi 9 lai lawn kai tawhin, talent tha tak a nei tih a lantir tawh. He hun tha hi bawhpelh lo turin kan duh a, Mercedes-ah hlawhtlinna a chan theih nan Williams team aiawhin duhsakna ka hlan a ni," tiin Claire Williams chuan a sawi.

Copyright © inkhel.com 2024. All rights reserved.