Jose Mourinho hnuaiah Manchester United-in hma an sawn nasa em em a, nimahsela club captain Wayne Rooney-a'n Portuguese coach hnuaiah khelhna hmun a chang tlem sawt hle. Mourinho-a'n Rooney hmalam hun a sawichiang duh lo a, Rooney hian United a chhuahsan mai ringtu an tam sawt hle.

"A hmalam hun chu amah inzawh a ngai ang. Karleh khian United-ah ka la awm ang em? tih pawh ka sawi lawk thei lo a ni a, engtin nge season tharah Rooney hi kan hnenah khel ang tih ka sawi lawk theih ang," tiin kum 31-a upa Rooney hmalam a hriatpui loh thu a sawi.

Kum 2004-a Old Trafford pantu hi Rooney hi United tana goal khung hnem ber a ni a, season tir lamah Mourinho-a'n inkhel bul țan tir țhin mahse tun hnaiah bench lamah a țhu tam zawk a ni. United 'Legend' Paul Scholes chuan Rooney hian United a chhuahsan a rin thu a lo sawi tawh a, nimahsela Mourinho chuan Rooney chu a hralh ngai loh tur thu a sawi thung.

Chelsea boss hlui Mourinho chuan, "Ka sawichian ngam chu Rooney hian United a chhuahsan a nih chuan ama duh thu renga chhuak a ni ang. United 'Legend' a ni a, engtikah mah chhuak turin ka nawr lui ngai lo ang. United tana a hun pum hman a duh nge hmun dang pan a duh tih hi chu amah in zawh tur a ni. Ka sawi fo tawh angin Rooney ka kawl hi ka lawm a, chhuak turin ka duh lo," tiin khelhna hmun chang tam lo Rooney chu chhuak turin a nawr lui dawn lo tih a sawi.

Rooney hi China lam pan turin angin sawi a ni fo tawh a, China lamah chuan February 28 thleng hi transfer window a la inhawng a ni.