Kumin World Cup-a tla hmasa ber chu Morocco an ni ta a, Luzhniki Stadium-ah Ronaldo tauh goal chu Portugal chuan chakpuiin si khat faiin Morocco an hneh. Iran an lo hneh tawh loh avangin a zawnin Morocco an tlawm a, Kumin World Cup atanga tla hmasa ber an ni ta a ni.

Tan atanga minute lina lekah Ronaldo chuan goal awmchhun corner atangin a tauh goal. 2018 Russia World Cup-ah game hnih atangin goal 4 a khung tling ta a, top scorer a ni mek. Tin Ronaldo hian record thar a siam bawk, Europe player zinga ram tana goal khung hnem ber ni thin Puskas chu goal khatin a lehpel ta, Ronaldo chu Europe player zinga ram tana goal khung hnem ber niin goal 85 a khung tling ta a ni.

Portugal 1-0 Morocco

(Ronaldo 4')

Portugal XI: Patricio; Cedric, Pepe, Fonte, Guerreiro; Carvalho; Silva, Moutinho; Mario, Guedes, Ronaldo.

Morocco XI: El Kajoui; Dirar, Da Costa, Benatia, Hakimi; El Ahmadi, Boussoufa, Belhanda, Ziyach; Amrabat, Boutaib.

A zawna an tlawm avangin Morocco tan round dawt leh luh a theih tawh loh, Portugal chuan khelh hnih atangin point 4 an hlawhchhuak a, Iran chuan point 3 neiin Spain chuan point 1 an nei. Iran vs Spain match-ah point khat ve ve pawh hlawhchhuak mahse Iran-in point 4 an nei dawn a, an game hnuhnung berah Morroco hi chak pawh nise chance an nei tawh lo hrim hrim a ni.

Goal hi tan atanga minute lina leka lut a ni a, Portugal chuan corner hlawhchhuakin; short corner an nei a, Joao Moutinho ball vawrh tha zet chu Ronaldo chuan dive pahin chiang takin a tauh goal. First half-ah Portugal chuan chance hlauhawm dang vawi khat an nei leh bawk a, Ronaldo ball pek tha tak chu Guedes chuan shot-in hei hi Morocco goalkeeper Munir chuan a lo save tha kher mai.

First half-ah hian Morocco lamin penalty hlawhchhuak thei niin an inngai, 28 mins-ah Amrabat chu box pawn atangin box chhungah Guerreiro chuan a titlu, referee chuan penalty a ham loh mai bakah VAR a ko lo bawk. Replay atanga a lan dan chuan Guerreiro hian ball a tawh hmain a titlu hmasa niin a lang. Hetih lai hian referee-in a ham loh chhan ber nia lang chu Amrabat khan Guerreiro a pawt hmasa niin a lang.

2026 World Cup thlen dil hlawhchham Morocco hian tlawm an hreh hle a, second half-ah theih tawp an chhuah, an game pawh a tha kher mai. Ziyech, Boussoufa, Belhanda leh Dirar te Morocco tan an khel tha hle. Younes Belhanda chuan an siphurh a rul teuh kher mai, Wolves keeper thar Rui Patricio chuan ropui takin a lo save hlauh.

Portugal erawh an khel a nawi hle a, second half-ah phei chuan an game-in awmzia a nei lo tak zet. He match-ah hian Morocco hian ball posessions 53% an nei a, shots vawi 15 an neih zinga vawi 4 chu goal zawnah a kal a. Portugal lamin shots vawi 6 chiah neiin heng zinga vawi 2 chu goal zawnah a kal.