Sheffield Wednesday midfielder, Ronaldo thianpa ni bawk Jose Semedo chuan Ronaldo-a'n a nunna a chhanhim thu a sawi.
Cristiano Ronaldo leh Jose Semedo hi naupantet atanga inkawmngaih em em an ni a, Ronaldo rawn lar chhuahna hmun Sporting Lisbon academy-a football khelh zir dun thin an ni.
Semedo hi Sposting Lisbon academy-ah hian beisei a phakloh avangin hotu lam ten chhuahtir mai an tum a, mahse Ronaldo vang liau liau in professional footballer a ni ve thei ta a ni.
An naupanlaia thil thleng chungchang Semedo hian sawiin, "Ronaldo khan club hotute hnenah ka chhuah chuan amah pawh a chhuah ve tur thu a sawi a, ka tan hmun a awmlo a nih pawhin a(Ronaldo) roomah ka awm ve theih tur thu leh kan bungraw dahna thlenga kan intawm vek theih tur thu Sporting Lisbon hotute a hrilh a ni" tiin a sawi.
Ronaldo-a'n a chunga thil ropui tak a tih chungchang hi sawi zelin, "A tan hian ka neih engkim hi pek leh ka ba a ni, ka rawn chawrchhuahna hmun Setubal hi seilenna atan a duhawmloh tak a ni a, ka naupanlaia ka thian tam tak te kha thil sual lian tak tak khawih in an hun an hman chho a ni.
"A then chu an thi tawh a, a then jail-ah an tang a, kha hmunah khan kir leh ta ila chuan mi car te ka ru anga, kan thiante ang khan ka hmalam hun chu a thim hle ang.
"Ronaldo hian ka nun hi a thlak danglam vek a, ka chhungkua, ka fate leh ka career thlengin, ka nun a thil duhawm tak tak thleng te hi amah vang vek a ni" tiin a sawi.