​Ronaldo-a'n GOAT a nih zawk thu a pho lang

21st June 2018, 05:06PM

2018 World Cup Group Stage match hmasa bera Ronaldo goal celebration chu enge a awmzia tiin khawvel mipuiin an inrinsiak, tunah chuan football pundits leh mi dang dang ten ni ngei tura an rin an sawi ta e.

Lionel Messi chuan adidas faknaah kel nen thla a tla, G.O.A.T tiin a inziak kalh bawk. G.O.A.T. (Greatest of All Time) niin a inchhal niin a lang, hei hi Ronaldo chuan Spain laka goal hmasa ber a khung khan a chhanglet niin a lang bawk.

Ronaldo hian a penalty hlawhchhuah goal-a a chantir hnu khan a khabehmul zuah chu a chul a, GOAT a nih zawk zia lantirna nia ngaih a ni chhunzawm. Ronaldo leh Messi inkar hi fans lamin an buaipui ber a, anni pahnih karah erawh inerna (inelna ni lovin) a awm lo nia sawi fo ni mahse engemaw chu a awm deuh a ni mahna.

Morocco an hneh hnu khan Spain laka a goal celebrate dan chungchang an zawhnaah Ronaldo chuan, "GOAT chungchang maw? fiamthu mai a nih kha, Quaresma lakah Spain lama goal ka khung chuan ka khabehmul hi ka ziat lovang ka ti a.

"Chutichuan hei goal ka khung leh ta bawk a, ka vanneih phah tlat mai, ka zuah rih dawn e," tiin Sports Illustrated a hrilh.

Ronaldo hian, "Messi ka tihelna a ni," a tih a rinawm loh, he a thusawi hi ama sawi ngei ni mahse enge a tih chhan tak erawh mipuite chuan an la inrinsiak tho chu a ni a. 

Kumin World Cup-ah hian Portugal chuan game hnih khel tawhin Ronaldo hian Spain lakah hattrick a siam hnuah nizan khan Morocco lakah goal khat a kung leh a, a team a chakpui bawk. Tun World cup-ah Ronaldo hi goal khung hnem ber a ni mek. Tin, Europe player zinga ram tana goal khung hnember record (85) a siam ta bawk a. An team tha em em lo mahse Ronaldo hian bul a tanpui tha khawp mai.

League game-ah pawh Ronaldo leh Messi te hi khaikhin an ni reng reng a, World Cup leh Major Tournament-ah pawh khaikhin an ni chhunzawm zel. Player pahnihte hian Ballon d'Or vawi 5 ve ve an dawng tawh a, Ronaldo hian Major Tournament (Euro)-ah Portugal a champion-pui tawh laiin Messi erawh a la champion lo.

Kumin World Cup hi Messi leh Ronaldo tan chuan World Cup hnuhnung ber a ni thei tawh maithei, chuvang chuan player pahnihte hian champion tumin theihtawp an chhuah chho mek zel a, an champion lo ve ve a nih pawhin record neih that tumin an tang khawp ang le.

Argentina hian an match hmasa berah Iceland an hmachhawn a, 1-1 in an inhnehtawk, zanin hian Croatia an hmachhawn dawn, Ronaldo-a'n goal 4 a khung tawh laiin Messi erawh goal a la khung lo, hemite pahnih chungchang hi engtin nge ni zel dawn? World Cup-a an chet that leh that lohvah Ballon d'Or dawn leh dawnloh pawh a innghat thui viau maithei bawk a ni.

Copyright © inkhel.com 2024. All rights reserved.