Manchester United defender hlui Rio Ferdinand chuan nikum atangin boxing a luhchilh a, thui tak kal a tumna erawh a theih dawn loh a, professional boxing licence an pe duh tlat lo a ni.

Kum 39-a upa Rio Ferdinand hian 2015 khan football a chawlhsan a, nikum September thla atang khan Betfair nen inthlunzawmin boxing khawvel a luhchilh a. Professional belt neih ngei a tum viau laiin professional licence an pek duh loh avangin a beiseina hi a thamral dawn ta a nih hmel hle.

Ferdinand hian professional boxing licence a dil a, a dilna hi British Boxing Board of Control (BBBofC) chuan an lo thlirho a, a dilna hi tihhlawhtlin a nih loh tur thu an hrilh bakah, a hnuah an ennawn leh tawh loh tur thu an sawi bawk.

Rio chuan, “Hreh tak chungin ka boxing glove hi ka dahthat mai a ngai dawn chu a ni a, a lungchhiatthlak ka ti tak zet a. BBBofC in boxing khawvela ka theihna lantir min phalsak ta lo hi pai dam harsa ka ti khawp mai a, tih theih ka nei der si lo,” a ti a ni.

WBC super-middleweight champion hlui Richie Woodhall chuan Rio Ferdinand hi training a pe a, inchawi lampang buaipuitu company Betfair chuan Ferdinand hi an thlawp a, ‘Defender to Contender’ challenge an kalpui mekah an telh a. Vawi 6 ngawt Premier League title la tawh Ferdinand hian boxing title lak a tum a, he a thil tum hi a puitlin thei dawn ta lo a ni.