​Rii& Hawla Tournament Quarter Final thlirlawkna

03rd April 2017, 04:04AM

April ni 1, 2017 khan Chhangphut Field-ah Rii & Hawla Football Tournament quarter final thawh khatna khelh a ni a, Hnahlan leh Vengthlang ten an khingpui an hneh ve ve, April ni 3, 2017 (Thawhtanni) hian quarter final thawh hnihna khelh a ni dawn.

ZOTLANG vs DILKAWN

Nikum Finalist Zotlang hian an match hmasa berah Ngaizawl an hneh a, Round of 16 ah Vengthar nen hun pangngaia inhneh tawkin Tie Break-ah vanneihna an chang a. Beiseina sang tak nen Tournament bul tan mahse Vengthar lakah an ropui bik lo.

An tum pui tur Dilkawn hneh tur chuan Vengthar inhneh tawkpuitu Zotlang kha an insiam that viau angai tawh ang. Tlar hma lamah Lalhmuchhuaka leh MFA Cup Champion team a mi Zonunthara te an nei a, Midfield thunun turin 2016 best player Chhante an nei bawk. Tlar hnungah Danny, Ramnuna leh NECS Cup Champion Team a mi K Lalthlahlova an la nei bawk. Team chhia an ni thei lo hrim hrim.

Zotlang hian fans an ngah tawk lo, Football atchilh veng hian fans ngahah kum dang an pha lo quarterfinal ah erawh player 12-na lamin tan an lak a ngai ve tawh viau ang. Galery khat tlatin 'Kan Zotlang ram nuam hi. . kan lenna Zotlang tam nuam" tih hla sa tham an awm lo anih chuan an player ten khelmual chhungah an theihna an pho chhuak thei lo anih pawhin an dem thei lovang.

Zotlang coach chuan VC leh coaching staff-te thawhrimna a zarah champion ngei an inbeisei thu an sawi a, Dilkawn hneh ngei an tum thu a sawi bawk.

Tun tournament-ah hian Dilkawn hleuh chhuak zo an la awm lo. An match hmasa berah Chawngtlai 5-1 ngawtin an sawp a, Round of 16 ah Bethel an hneh leh bawk. Dilkawn hian Tun tournament-a Top Scorer ni lai Lallawmtluanga an nei bakah Nikuma top scorer ball pet thiam Saihmingthanga an la nei bawk.

Lallawmtluanga hian goal 5 a khung tawh a, kum 17 leka upa ani a. Zotlang hian a naupanna an ngainep ngawt thei bik lo vang. Tournament tan tira an chhawr theih loh Senior John-a a in lan leh theih chuan an phuisui sawt leh dawn a. Ball thiam Hriat-a an la nei bawk. Dilkawn hi Kelkang Zone-ah vawi duai lo an lo champion tawh a, Chhangphut field-ah erawh an vanduai leh thin kumin ah erawh vanduai nawn an duh tawh dawn lo.

Dilkawn hi Champhai atangin hla deuh mahse Chhangphut field rawn pan khawm turin Dilkawn mipuite hian Football an tuichilh tawk a, Galery khat hmura Dilkawn mipui an thu thup anih pawhin thil mak ani lovang.

Dilkawn Quarterfinal an luh theih chhan chu an player leh coaching staff te thawhrimna vang anih thu sawiin Dilkawn mipui a tam thei ang ber nen Chhangphut field rawn pan an tum thu a sawi bawk.

KHAWLZAWL VENGTHAR vs RUANTLANG :

Khawzawl vengthar hian an match hmasa berah New Champhai tumin hun pangngaia inhneh tawkin Tie break-ah vanneihna an chang a. Round of 16 ah erawh Vangchhia 3-1 in an hneh thung. Nikum an Champion tuma Captain Lalzoa te uanau 4 team Saquad ah awm mahse inhliam vangin an inlan mumal thei lo a.

MPL Best Keeper Mala a dam chiang lo a, Lalzoa pawh inhliam vangin Chhangphut Field ah a hmel a la inlan lo bawk a ni. An Defending khaipa Thakima I-League vangin a chhawr theih loh bakah Malsawma Red Card vangin an chhawr thei dawn lo a. Mahse an Under - 16 players KC Zorema , Sangdinga , Venkima leh Lawmkima te hian an thiamna an pholang ngam a nih chuan Ruantlang tan a hlauhawm ang.

Nikuma Khawzawl Vengthar Champion puitu kumin an Asst Coach Lalnaua chuan inngaitlawm takin 'Nikumah vanneih vangin kan champion tawh a, Kumin pawh hian Pathian zarah nomawi chawi nawn leh kan tum a ni" a ti.

Ruantlang hian an match hmasa berah Zokhawthar an hneh hram a, Round of 16 ah Zote si 3 faiin an hneh bawk. Tun hnaia Ruantlang that ber tum ala ni hial ang. Ruantlang hian Army Green player, Chanmari FC tan pawh a lo khel tawh Isaac-a an nei a, Ruantlang game innghahna ani leh ang.

Ruantlang tan Zodingliana'n ni dang anga a khelh leh theih chuan goal a khung leh lovang tih a sawi theih loh he ke veilam hmang thiam hian goal ropui khung a thiam tlat. Tlar hnungah Sipai khela Lalfakawma te unau an awm leh dawn a, hrem tawk an captain-in a ho leh thei bawk ang.

Ruantlang coach chuan 'VC hmanga an tel loh thu leh khawtlanga mithahnemngai te huahawta tel kan ni a, Pathian chakna ringin Champion lai hneh ngei kan beisei" a ti.

Inkhel Reporter : Jacob Khawlhring

Copyright © inkhel.com 2024. All rights reserved.