​Rii & Hawla Inter Village Football Tournament 2017 Quarter Final draw neih a ni

01st April 2017, 05:04AM

March ni 31 zan khan Kahrawt YMA Hall-ah Champhaia Tournamament lian ber leh lawmman tamna ber Rii & Hawla Inter Village Football Tournament 2017 Quarterfinal draw neih zawh a ni.

Inrinnia inkhel tur thlirlawkna

12:00 PM TUIPUI vs VENGTHLANG :

Hmanah chuan, Hmanah chuan

Vai Lal nupui ka awm a.

Tunah chuan, tunah chuan

ka pu Saza nau ka awi e.

Vengthlang chanchin sawi dawn apiangin hmanah chuan tih a ngai thin. Champhai football ah hun rei tak chhung ro an rel a. FC Youngers a pian atangin veng leh veng in elna leh Football club ang pawhin ngai an la awh leh tawh lo. Tun hnaiah Vengthlang FC an thangharh a, Ist Div Club an ni mek, tun tournament-ah hian VC hmingin tel thei lo mahse Football club angin an tel thung a. An match hmasa berah Rabung lakah an him hram a, Round of 16 ah Kanan II hnehin quarterfinal an inhlangkai. Vengthlang hian MFA Cup 2017 Champion Team Captain leh top scorer ni bawk Isaac-a, senior player Lalrinawma, Jonas-a leh Lalruatkima te an kawl a, player naupang zawkteah inrintawkna an neih tir ang.

An coach Jerome Hauzel hi tualchhung football ah a hming langsar mahse Vengthlang hi coach anga Team a enkawl vawikhatna ani a. 100% record a la nei a. Team a enkawl vawikhatnaa champion hi a tum viau ang. Vengthlang coach chuan Quarterfinal atangin player 12-na an tam tur thu sawiin Tuipui tan an huphurhawm tur thu a sawi.

Vengthlang mipuite hian Tuipui tuilian hi an au ding zo dawn em? Naktukah a hriat ang.

Tuipui hi he tournament-ah hian thleng sang ngai lo mahse, team chhe pawl an ni ngai lo, vanduai vangin an lo chak lo tawh thin. Nikum ah Khawzawl Zuchhip lakah goal 2 -a hma an hruai hnuah an inlehthal tir leh. Kuminah erawh Vengthlang lakah chetsual nawn an tum tawh dawn lo. Tuipui hian an match hmasa berah Dinthar an hneh a, Round of 16 ah Mipui rinhlawh zawk Mualkawi an hneh leh bawk. Khawpui chhung veng lian an tum tawh dawn a, fiahna tak tak leh hau tak zawk an hmachhawn ang. Tuipui tan Senior player Mualkawi laka goal 2 khungtu Vanlalpeka a la tar lo, an innghahna a ni leh dawn. A sirah tlan chak Lalengmawia MFA Cup 2017 champion player a awm dawn bawk. Player langsar kawl tam lo mahse, an innghahna tur chu combination an neih that hi a ni leh ang. Tun tournamentah Tuipui tui lian dal zo an la awm lo. Naktuk hian Tuipui lianin Champhai khawpui chhung venglian ber Vengthlang a hnawl zo dawn em?

Tuipui coach Rosangkima chuan Tuipui tui lian hi engmahin a dang zo lo dawn loh thu inring tawk takin a sawi a. Tuipui mipui tam thei ang ber nen an rawn thawhchhuah tur thu a sawi.

2:30 PM HNAHLAN vs VENGLAI :

Hemi te inkhel tur hi Final ai paw'n a nghahhlelhawm zawk bik lovang. Venglai hian nikum hmasa final-ah Vengthlang North an lo hneh lo tawh a. Nikumah beiseina sang tak nen an match hmasa berah Neihdawn an hneh lo leh bawk. Kuminah erawh a dan a dang tawh viau ang. An match hmasa berah Ngur hnehin Round of 16 -ah Vemgthlang North lakah phuba an la bawk. Venglai hian senior player tawn hriat ngah Malsawma Chhangte, MZU Vice Captain hlui Lawmsangpuia, Zosangliana bakah MFA Cup 2017 Champion player Teka leh India Junior player Zonunmawia an la nei bawk. Venglai hian fans an nei chhe ngai lo, naktuk hi school leh office chawlh anih avangin mipui an rawn thawkchhuak tha dawn chiang sa. Hnahlan au zam turin Player 12-na te hian an tih tur an hria ang.

Venglai player Zosangliana chuan Hnahlan chu an tum chak ber an nih thu leh hneh ngei an in beisei thu a sawi.

Hnahlan hi inkhel thiam khua an ni. Qurterfinal an kal kawngah team chhia an la tum lo. An match hmasa berah Tuipuiral champion Khuangleng hnehin Khawzawl inkhel thiam veng Zuchhip an hneh leh a. Round of 16 ah Champhai khawpui chhung team tha Kahrawt an hneh leh bawk. Player langsar kawl hnem ber pawl an ni a. Hnahlan player pawimawh Ramengmawia hi Venglaia lo khel tawh thin a ni a, a veng hlui Venglai laka goal khung leh hnehna chan hi a tum ber a ni ang. Dinthar FC Player hlui Tlangthanpuia, Chanmari west player hlui Zaremsiama Chhangte bakah MFA Cup Champion keeper Lalnunpuia an nei. Lalnunpui hian MFA Cup 2017 ah goal vawikhat mah chhuah lovin Bethel FC a champion pui a, Mizoram record a ni. An captain Lalhuapzauva hi Champhai football ngaina tu zinga hre lo an awm chuan an la naupang a nih loh vek chuan tun hnua football tui that chauh an ni ang. Signal player Huapa hi Hnahlan innghahna a ni leh ang.

Hnahlan Captain Huapa chuan Fiahna hmachhawn tura an inpeih thu sawiin Hnahlan Welfare hmalaknain hnahlan khawchhuak Champhaia awmte bakah leh Hnahlan atangin mipui thahnem tak an rawn thawhchhuah tur thu a sawi bawk.

Thawhtan hian Quarter Final khelh chhunzawm a ni leh ang a. Champion lai Khawzawl Vengthar in Team tha Ruantlang an hmachhawn ang a. Nikum Runner Up in Dilkawn an hmachhawn ve bawk ang.

Inkhel Reporter : Jacob Khawlhring

Copyright © inkhel.com 2024. All rights reserved.