April ni 3, 2017 khan Chhangphut Field ah Champhaia Tournament lian leh ngaihhlut hlawh ber Rii & Hawla Inter Village Football Tournament chu Quarterfinal thawhhnihna khelh a ni a. Inrinni khan Quarterfinal thawhkhatna khelh niin Vengthlang leh Hnahlana te'n Semifinal an lo lut tawh a. Thawhtanni khan Khawzawl Vengthar leh Zotlang te'n an hnung an zui ve leh ta a ni.
CHAMPION LAI KHAWZAWL VENGTHAR AN KAL ZEL :
Quarterfinal match thumnaah Champion lai Khawzawl Vengthar leh Ruantlang inkhelin Khawzawl Vengtharin 2-1 in hnehna an chang a, inkhel zawhah buaina te nau a chhuak.
Ruantlangin an player pawimawh ber tih ngam Zodingliana'n hrem a tawh avangin an chhawr thei lo, tlar hnungah Opa leh Hriata te an dah a, Isaia leh Dawnga a sirah dahin Army Green player Isaac-a leh a u Faka bakah Lalhmuzau midfield-ah awmin Zonunmawia leh Zothanpuia, Rosangliana te tlar hmaah an dah bawk.
Khawzawl Vengthar tan MPL best goal keeper Mala'n goal vengin tlar hnung laiah Bawihpuia leh Zaia awmin a sirah Fakawma leh Ramdinthara an awm a. Midfield-ah Zo-a leh Sangdinga awmin an hmaah Kimtea a awm a. Tlar hmaah PC-a, Avena leh Lawmkima te an in tlar bawk.
Inkhel tan atangin boruak a tang nghal at a, Champion lai Khawzawl Vengthar an chungnung thei bik lo. Ruantlang hi an game that ber tum a la ni hial mai thei, ball an chang tam a, attacking third ah an tal buai leh thin mai pawh a. Inkhelh tan atanga min 16-naah Khawzawlin an goal khatna an khung a. Khawzawl striker Pc-a'n ball chak zeta um lutin keeper chiah awm tawhah a pet goal lo, Ruantlang keeper-in a lo beng ber hman hemi per hi Lallawmkima'n chiang zetin goal-ah a chhui lut.
Ruantlang lamin midfield-ah ball chang tam mahse an hmatawngte tan ball tha an vawrh lut thei lo, Counter attack atangin khawzawlin an nawr let thut thin a, goal hlauhawm an hnem zawk. Min 25-naah penalty area pawn hret atangin Lalfakawma'n kawh zetin goal-ah a shot a, Ruantlang defender-in lo dang pial zeuhin keeper tan chet ngaihna a awm lo goal ah a lut. Ruantlangin Isaac-a hmangin goal khung theihna hun tha an nei. MPL Best goal keeper Mala'n tha zetin a dan sak.
2nd half ah goal phur Ruantlangin an siphurh sut tumin Opa midfiela ah dahin Fakawma a tawlh let thung a, an game a tha sawt. Ball kang an vawrh lut nasa a, Khawzawl defender palian Zaia leh Bawihpuia te an paltlang zo lo. Isaac-a ball vawrh luh tha zet Zonunmawia'n lo tauhin goal sirah chiah a kal. Hemi hnu hian Khawzawlin goal khung theihna hun tha an nei, Pc-a'n keeper chiah awm tawh a, a pet out. Ruantlang player Rosangliana chu double yellow card vangin min 73-naah hnawh chhuah a ni a.
Khawzawl player Zo-a inhliam vangin lakchhuah ani bawk. Ruantlangin goal khung theihna hun tha an nei. Line bul atangin Isaac-a'n ball la-in Zothanpuia tan a vawrh lut a, referee-in goal line a pel hman avangin a ham. 2nd referee in a phar si lo, Ruantlang an lawm lo hle. Min 81-naah Ruantlangin penalty hlawhchuakin Captain Isaac-an goal-ah a chantira an siphurh a rul then. Hun tawp thlenga goal dang luh belh loin Champion lai Khawzawl Vengtharin 2-1 in hnehna an chang ta a ni.
Khawzawl Vengthar hi tun hnaia he tournament-a Champion lai Semifinal thleng nawn thei hmasa ber an ni a. An game leh an chak dan thlir in Champion nawn hmasa ber an ni lovang tih a sawi theih loh
BUAINA A CHHUAK : Referee thutluknaa lungawi lo Ruantlang Fans te'n field chhungah lung an vawm luh bakah referee kut thlak tumin an bei a, buaina hi rei lo teah chinfel zui nghal a ni.
RUAHSUR HNUAIAH PAWH ZOTLANG TAN DILKAWN A ZAU TAWK LO :
Quarterfinal Match hnuhnung berah Nikuma finalist Zotlang leh Dilkawn inkhel in Zotlangin si 5 faiin Dilkawn an sawi sa.
Zotlang hian 4-2-3-1 formation hmangin Vana'n goal a veng a. Hrem tawk K Lalthlahlova aiah Apui dah lutin Ramnuna nen an ding tlang a. A sirah Lalruattluanga leh Chakzela te an ding a. Midfield-ah Chhante-a leh Sawmpuia awmin an hmaa Mapuia, Jeru-a leh Zohnuthara te an intlar a, a hmaah Chhuakte a mal tlat bawk.
Zilkawnin 4-3-3 formation hmangin Lalthatluanga'n goal a veng a, tlar hnungah Rina, Lalmama, Lawmawma leh Thangtea te an intlar a. Midfield-ah Ramnuna Valpuia leh Sailova te an awm bawk. A hmaah Valte leh Goal nga khung tawh Rawlthar duhawm Lallawmtluanga leh Dinthar FC player Saite-a te an in tlar bawk.
Ruahsur avangin game a hun takah tan theih a ni lo va, Inkhel tan hnuah pawh inkhel tih tawp lailawk ani bawk. Inkhelh tan atanga min 6-na lekah Jeru-a hmangin an goal khatna an khung nghal. Dilkawn an insiam rem thei lo, Zotlang in game an thunun zawk a, Dilkawn an nawr bet deuh reng a, goal hlauhawm pawh an nei hnem zawk.
Dilkawn buaina belhchhah turin Min 16-naah Chhuakte-a hmangin Zotlangin an goal hnihna an khung zui leh. Field ah tui atlin nasat avangin player tan an thiamna tak tak an phochhuak thei lo. Zotlang midfielder Chhantea leh Sawmpuia te an langsar a, Zotlang chakna an ni a tih theih ang. Min 22-naah Zotlang goal 1-na khungtu Jeru-a bawk rawn lang lehin Zotlang goal thumna a khung leh. 1st Half tawp dawn lamah goal phur Dilkawnin Zotlang an nawr bet zawk a, Zotlang defender Ruattluanga te unau leh Apuia te ho an ding khawng tlat.
2nd Half-ah Dilkawnin bul an tan tha zawk a, goal khungna hun tha nei mahse Zotlang keeper Vana'n tha zetin vawi hnih a dan sak. Zotlang lamin counter attack atanga nawr let thutin tlanchak Zonunthar a dawk chak thei hle. Min 74-naah Zotlang defender Apuia'n Zotlang goal 4-na a khung a. Zotlang fans te'n goal khungtu Apuia lawmpuiin an au thawm a ring hle. Min 82-naah Zotlang striker Chhuakte'an ama goal 2-na leh Zotlang goal 5-na a khung leh a.
Si phur Dilkawnin a tawp thlengin theihtawp an chhuah a, an siphurh sut tumin nawr ngial thin mahse Zotlang tlar hnung an pal tlang thei lo. Goal khung thiam Lallawmtluanga leh Saitea te dangchatu Ramnunsanga leh a hote an fakawm tak zet. Hun tawp thlenga goal dang luh belh lohin Zotlangin Ruahsur hnuaiah Dilkawn an hleuh chhuak ta ani.
Ruahsur hnuaia a tawp thlengin Zotlang mipui an au rual peih "A zim laiah Dilkawn ho kan nek sawrpawr e' tiin Min 90 chhung khawvawt hnuaiah an au rual a, field chhungah goal 5-in an player ten an chhang let thung a ni.
Inkhel Reporter : Jacob Khawlhring