Rii & Hawla Inter Village Football Tournament, Chhangphut Field-ah khelh mek chu April ni 5, 2017 khan semi final khelh a ni a, Hnahlan leh Zotlangte chuan an khingpui ve ve hnehin final an lut ta a ni.
VENGTHLANG ZIN KAWNG HNAHLANAH A TAWP :
Semifinal hmasa zawkah Vengthlang leh Hnahlan inkhelin goal 8 ngawt a lut a, Hnahlanin 5-3 in hnehna an chang.
Vengthlangin tlar hnungah Biakrema, Mawia, Zotea leh Ite-a te an rem a, midfield-ah Tepy-a, Jessy-a leh Rk-a te awmin an hmaah Isaac-a, Jonathan-a leh Lalrinawma te an awm a, Tpa'n goal a veng bawk.
Hnahlanin tlar hmaah Tlangthanpuia, Zaremsiama leh Makhuma te tlarin an hnungah Lianhminga, Captain Huapa leh Ramengmawia te an dah a. Tlar hnungah Sainghinglova, Chullova, Muanpuia leh Thangchhunga te dahin Lalnunpuia'n goal a veng bawk.
Inkhelh tan atanga min 2-nah Vengthlangin Corner an hmu a, Corner atang hian Jonathan Lalsiamthara'n Vengthlang goal khatna a khung nghal. Inkhelh tan tirhah ruah a sur avangin player-te'n an duh angin ball an khawih theih loh bakah ball pass sual a tam a, inkhel erawh a hmuhnawm loh phah chuang lo. Min 15-naah Zaremsiama'n tha zetin ball a rawn cross-a Hnahlan Captain Huapa'n a awm a lo dangin lei a tlak hmain a volley goal a. Tpa tan dan ngaihna a awm lo goal mawi tak a ni. Team pahnihte an khel tha dun a, chungnung zawk an awm thei lo, midfield battle a hmuhnawm ngang mai. Vengthlang tan Jessy-a a che thain Hnahlan ball inpe kual tur a dang chat hnem hle.
Min 22-naah Hnahlan keeper Lalnunpuia a chesual a, a ball pet chhuah chhe lutuk lo dawng tu Isaac-a'n lo dawngin Yard 30 vel atangin a ball a tlan luh pui a, Hnahlan defender-te'n an ti buai hman lo Vengthlang hmahruaina goal a khung. Ruahsur a hana inkhel a hmuhnawm sawt. Min 42-naah Hnahlanin defender goal khung thei Sainghinglova hmangin an siphurh an sut ve leh. Hun chan ve a ral zui.
2nd half ah goal a lut lawk lo va, Hnahlan game a tha hret a, Vengthlang player-te an thawkrim bawk. Vengthlang tan Rka leh Isaac-a te nidang zawng aiin an game a tha, Hnahlan playmaker Ramengmawia leh Huapzauva te khel a hmuhnawm hle. Min 71-naah Penalty area pawn hret atangin Ramengmawia'n goal-a pet a, Vengthlang keeper Tpa'n a teh sual a position a fuh tawk lo, ball a man nget zo lo goal-ah a lut. Tpa demawm mahse goal khungtu Ramengmawia erawh fak a phu. Min 83-naah Vengthlangin corner hmuin rawlthar duhawm Jessy Lalmawizuala'n chiang zeta tauh goal-in Vengthlang siphurh a rul. Hun pangngai a zova hun pek belh min 30 khelh a ni.
Hun pek belhah pawh player-te anla tang khawng reng thei. Vengthlang kulhpui Biakrema inhliam vanga lak chhuah niin a aiah Lalremruata an dah lut a, Remruata hi khelh tha viau mahse Vengthlang defender-te'n ngai an awh thei tawh lo. Min 112-ah Hnahlanin corner hmuin Tlangthanpuia'n an goal 4-na a khung a. Hnahlan an chungnung chhunzawm nghal a, Min 199-naah Hnahlan tan lang lo ruama tangkai Hmingthana'n ball tha zeta khalh lutin changtu nei lo Zaremsiama pe in Zarema hian mawi zetin Vengthlang goal-ah a pet lut. Hun a tawpzuia Hnahlanin 5-3 a hnehna changin Final an lut ta a ni.
KHAWZAWL VENGTHARIN ZO-TLANG AN LAWN CHHUAK ZO LO :
Semifinal hnuhnung zawkah Kum 2016 finalist Zotlang leh Khawzawl Vengthar inkhelin Zotlangin phuba lain si 2 faiin hnehna an chang.
Zotlangin tlar hmaah Chhuaktea dahin a hnungah Jeru-a, Zonunthara, Zothanpuia te an awm a, Midfield-ah Chhantea leh Sawmpuia awmin Tlar hnungah hrem tawk Lalruattluanga chhawr thei lo mahse K Lalthlahlova a rawn kir tawh a, Ramnunsanga, Lalhluna leh Chakzela te awmin Chakzela'n goal a veng bawk.
Kum 2016 Champion Khawzawl Vengthar tan MPL Best keeper Mala'n goal vengin Bawihpuia, Zara, captain Malsawma leh Ramdinthara te intlarin, Sangdinga, Johnson-a, Lalrinkima, Lawmkima, Fakawma te bakah Pc-a te an awm bawk. Inhliam vangin Lalzova'n bul tan lo mahse dah luh leh tho a ni.
Champion lai Khawzawl Vengthar hian player inhliam leh damlo an neih avangin an that dan berin an inrem thei lo. Zotlang erawh Ruattluanga tih loh an inlan kim thei thung.
Zotlangin bul an tan tha zawka inkhel an thunun tluan chhuak bawk. Khawzawl midfielder-te'n ni dang an pha lo va, an striker tlan chak te tan ball tha an pe thei lo. Inkhelh chhung zawngin goal hlauhawm an nei mang lo a tih theih hial ang. Zotlang tan Chhantea leh Sawmpuia an khel tha a, Zonunthara leh Lalhmuchhuaka te an hmuhnawm a, Khawzawl defender-te che tha lo phei se chuan goal an phur nual lovang tih a sawi theih loh. Min 32-naah Khawzawl defender Bawihpuia banah banah ball-in a fuh a, penalty an chawi a Ramnunsanga'n goal-ah chantirin Zotlang goal khatna a khung zui.
2nd half-ah pawh Khawzawl an insiam rem thei lo, a bet zawkah bawk an tang leh a, goal nawr tumin Venkima rawn dah lut mahse Zotlang defender-te an dingkhawng tlat a, goal khungna hun tha an insiam thei chuang lo. Zotlang Captain Chhantea'n penalty area pawn atangin tha zetin goal-ah a pet a, Mala'n ropui takin a lo save Mala a inhliam zui a, lakchhuah a ni. Khawzawl Vengthar-in inhliam Lalzova rawn dah lut mahse a pawimawh ber goal an khung thei lo.
Min 90 a zova Min 90+5 ah Zonunthara'n goal ropui a khung a, Yard 30 velah ball changin Khawzawl keeper a rawn chhuak tih hmuin goal-ah a pet thut a. Keeper pet khumin goal-ah a lut. Hun a tawp zui a Zotlangin si 2 faia hnehna changin Kum 2016 final-a an lo hneh loh tawh phuba an la ta a ni.
Inkhel Reporter : Jacob Khawlhring