Red Bull team chuan tun season tawpah chuan Renault nen an inzawmna an tichat ang a, season thar atangin Honda engine an hmang tawh dawn.
Formula 1 team Red Bull te hi kum 12 chhung zet chu Renault nen an lo inzawm tawh a, Renault engine an hman chhung hian 2010 atanga 2013 khan a zawnin kum li chu world title double an lo la tawh a. Heti chung hian Red Bull chuan Honda engine an hman chuan a hma aia an chet that theih zawk an beisei a ni.
Red Bull hian Renaulh thlauh thlaa Honda engine hmang tur hian kum hnih chhung atan inremna an ziak phawt a, 2019-20 atangin Honda engine hi an hmang tan ang.
Team principal Christian Horner chuan, “Honda nen kan inzawm tur hi a phurawm a, Red Bull Racing team chuan bung thar kan kai dawn a, grand prix-a chak chauh kan duhtawk lo a, championship title lak ngei ka tum hle a, hei vang tak hian Honda engine hman pawh hi kan tum phah a ni,” a ti.
A sawi zelnaah, “Thutlukna pawimawh kan siam dawn hian uluk takin a thatna leh that lohna kan buk tawn zel phawt a, duh kan thlan chat tawh chuan tha kan ti tawk viau tihna a ni thin a. Tun tumah pawh hian ngunthluk taka kan ngaihtuah hnuah kawng dika min hruai thei tur nia kan hria Honda hi kan thlang ta a ni,” a ti bawk.
Honda chuan season thar atangin Red Bull team te engine hi an siam tawh dawn a, tun season chhungin junior Toro Rosso team engine pawh an lo siamsak tawh bawk a ni.
Honda president Takahiro Hachigo chuan, “Team hnih kan enkawl tur hi a phurawm kan ti hle a, heti a nih chuan kan tan pawh hmasawnna a tam phah dawn a ni,” a ti.
“Toro Rosso leh Red Bull Racing te hian kan thil tum min tihhlawhtlinpui thei ngei dawnin kan hria a, grand prix leh championship title kan hmuh chhoh ngei kan beisei a. Hun rei zawk tha taka kan thawhho theih kan beisei hle a ni,” a ti bawk.
McLaren chuan Honda nen thla 9 chhung an inzawmna chu tihtawp an rel a, Japanese company engine vangin championship title an beisei theih loh phah niin an sawi a. McLaren hian Renault engine lei an duh zawk a, hetianga an chet vang hian $100 million vel zet chu an hloh hmel.