Record tharin Nadal a hmuak

22nd April 2018, 03:04AM

Rafael Nadal chuan Monte Carlo Masters semi final-ah Grigor Dimitrov chu 6-4, 6-1 in a hneh a, record thar a siamna tur Masters title 31-na a hnaih ta hle.

Spanish pachal hian inkhelh tan tirh atangin harsatna a nei lo hle a, Bulgarian tennis star, 4th seed Dimotrov nen hian vawi 12 an inkhel tawh a, Nadal hi vawi 11 a chak ta a, Pathianni hian final an khel ang.

Nadal-a tan chuan final hi a pawimawh em em dawn a, a chak chuan record thar a siam ang a, Masters title la hnem ber a ni thei dawn a, a chak loh erawh chuan World No. 1 a nihna chu Roger Federer lakah a hloh thung ang.

Final-ah hian Nadal chuan Alexander Zverev, Germany leh Kei Nishikori, Japan te inkhela a chak zawk zawk a hmachhawn dawn a. Nadal hi a champion a nih chuan title hrim hrim a lak vawi 76-na a ni dawn a ni.

Vawi 16 ngawt mai Grand Slam champion lo ni tawh Nadal hian Masters title vawi 30 a la tawh a, Novak Djokovic nen he record hi an chelh dun mek a, Pathianni hian a champion a nih chuan record chelhtu awm chhun a nih phah dawn a. Nikum khan Monte Carlo champion a ni tawh a, title pangngai vawi 10 la thei awm chhun a ni a, Barcelona leh French Open title pawh vawi 10 ve ve a la tawh bawk.

Copyright © inkhel.com 2024. All rights reserved.