​Rashford hian Mbappe a tluk lohna a awm bik lo - Phil Neville

22nd September 2017, 02:09AM

Manchester United defender hlui Phil Neville chuan United forward Marcos Rashford chu World class player ni chho mai turin theihna a neih thu leh tunlaia player naupang tha nia sawi mek Mbappe leh Ousmane Dembele te nen pawh an intluktlan thu a sawi.

Nilaini zana United in Carabao Cup third round-a Burton Albion an hneh tum khan Rashford hian goal hnih a khung a, a goal hnihna phei chu a pui hle a, box pawn atangin kawh zetin a thlawh goal a ni.

Kum 40 mi Skysports tana football pundit hna thawk mek Phil Neville chuan hahipin Rashford a fak. "Tu pawhin Ousmane Dembele leh Kylian Mbappe an fak, Rashford erawh kan ramah hian an sawi lang lem lo.

" A chhan chu English mi a nih bakah left wing ah khelh tir a ni thin a. Dembele leh Mbappe te nen hian thiam zawngah pawh an inangkhat hle, thenkhat chuan a laiah tlan se an duh thin, ani hi chu a sir leh a laiah khawi hmunah pawh a khel thei.

"Barcelona chuan an club record in Dembele an lei, Mbappe pawh PSG in to takin an lei a, teenager zinga man to ber a ni. Rashford pawh hi lei chhuak ve dawn ta se £100m-£150m man vel a ni ang, heng player pahnih te ang thova to a ni dawn.

"Louis van Gaal hnuaiah a rawn parvul, Mourinho hnuaiah hmun a chan loh mai a rinawm laiin match lianah a khel ta zel a, goal a khung chhunzawm zel bawk a. World class a rawn ni thei vat dawn," tiin Phil Neville chuan a sawi.

Rashford hian United tan a game hnuhnung 5 atangin goal 5 a khung a, United chuan tun season ah title 4 an lak theih a rin leh rin loh an zawhna chu Neville chuan, "An hmatawng en hi chuan an theih ngei ka ring tlat a ni," tiin a chhang. 

Copyright © inkhel.com 2024. All rights reserved.