​Ramhlun North in New Serchhip an sawp

14th December 2016, 09:12PM

December ni 14, Nilaini khan Ramhlun North leh New Serchhip ten MPL 6 khel tur zawnna thawhkhatna an khel a, Ramhlun North chuan 6-1 a New Serchhip sawpin an chak nghal a,  second leg hi December ni 16, Zirtawpah an khel leh ang.

Ramhlun North FC hi MPL 5-ah pasarihna niin Play off hi ankhel a, New Serchhip FC hian qualifier match hnuhnung berah Venghlui FC hnehin Play off khel ve bawkin; team pahnih te an in tawn vawikhat naah Ramhlun North hian 6-1 in ansawp a, New Serchhip hian MPL 6 khelh an duh chuan second leg-ah 6-0 a hneh an ngai tawh ang.

Ramhlun North FC 6-1 New Serchhip FC

(V Lalramzauva 15', Lalremruata 35', Isaac Lalruatpuia 37', Francis Onyeama 42', 76', Zosangliana Sailo 83')

( Lalhriatzuala 41')

Team pahnih te inkhelah goal 7 lai alut a, Ramhlun North FC tan Onyeama chuan goal hnih khungin, V Lalramzauva, Lalremruata, Isaac Lalruatpuia leh Zosangliana (Chhaia) ten goal khat theuh an khung; New Serchhip FC tan Lalhriatzuala chuan goal khat akhung ve bawk.

Goal lut hmasa ber hi first half tan atanga minute 15-ah Ramhlun North tan midfielder Ramzauva thun a ni. Ramhlun North FC chuan inkhel thunun zawkin minute 35-ah Isaac-a ball cross tha zet chu box chhunga awm winger Remruata chuan an goal hnihna atan a thun leh a, minute 2 aral leh hmain Onyeama ball vawr luh chu winger Isaac-a chuan set piece atangin an goal thumna atan mawi takin a pet goal leh a ni.

Ramhlun North chuan 3-0 a hmahruaiin chawlhlawk an hmang dawn emaw tih hnu huntawp nan minute 4 ala awmin New Serchhip tan Hriatzuala chuan an goal khatna thun ve bawk mahse, Ramhlun North tan Nigerian forward Onyeama chuan minute 1 aral leh hmain an goal lina thun leh nghal zatin Ramhlun North chuan 4-1 a hmahruaiin chawlh lawk an hmang ta a ni.

Second hlaf-ah pawh Ramhlun North chuan inkhel thunun chhunzawm zelin minute 76-ah Onyeama bawk chuan an goal ngana athun leh a, minute 83-ah Onyeama free kick hlawhchhuah chu Zosangliana (Chhaia) chuan Ramhlun North tan pet goal-in an goal rukna a thun a, goal dang luh belh tawh lo in, Ramhlun North chuan 6-1 in hnehna an chang ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.