Ramhlun North FC leh Chanmari FC 2-2 in an inhnehtawk

10th November 2017, 01:11AM

November ni 9, Ningani tlai khan Mizoram Premier League Season 6 Round 13 na match hmasaber Chanmari FC leh Ramhlun North FC ten an khel a, chak zawk awmloin 2-2 in an inhneh tawk a, point khat ve ve an insem ta a ni. Inkhel hmuh nawm takah V.Lalchhuanawma Ramhlun North FC midfielder chu Man of the match-ah thlan a ni.

Phase 1 Round 4-ah team pahnihte hi inhmachhawn tawhin Chanmari FC hian 2-0 in hnehna an chang a, an intawn vawi hnihnaah erawh chungnung zawk awmloin an inhnehtawk thung.

Ramhlun North FC 2-2 Chanmari FC

(V.Lalchhuanawma 55', John Kweku Ampong 57' ) (Vanlalbiaa Chhangte 59', Rochhingpuia 90+3')

Ramhlun North FC hian Samson Ramengmawia hnuaiah vawi li hnehna chang tawhin vawi li draw an nei tawh a, vawi nga an tlawm tawh. Tun season MPL-ah khelh 13 atangin point 16 an nei mek a, table-ah pangana an ni.

Chanmari FC hian match hnuhnung berah Bethlehem Vengthlang FC an hneh a, Ramhlun North FC an draw a, an dinhmun an sawh nghet zel. Coach Vanlalthlanga hnuaiah vawi nga hnehna an chang tawh a, vawi li draw neiin vawi li an tlawm thung a, point 19 neiin table-ah pathumna an hauh mek a, semifinal khel turin an dinhmun an siam tha zel a ni.

Goal lut te hi second half-a lut vek an ni a, Ramhlun North FC chuan minute 55-ah Lalliansanga (Notea) shot tha zet Chanmari FC keeper Muanawma dan per nangchinin Chhuanawma chuan a pet goal a, minute 2 a ral leh hmain Liberian midfielder John Kweku Ampong chuan an goal hnihna a khung zui nghal zat bawk a, si hnih faiin Ramhlun North FC chuan hma an hruai der mai.

Chanmari FC chuan nawr letin minute 59-ah Mabiaa chuan Ramhlun North FC defender Muanawma a bum hnuah chiang zeta pet lutin an goal khatna a khung zui a, huntawp dawn injury time-ah bench atanga lut Rochhingpuia chuan box pawn atangin tha zetin a shot a, hei hi Ramhlun North FC goalkeeper Sangpuia chuan a dang pial, a lut ta, Chanmari FC chuan an siphurh an rul a, 2-2 in an inhnehtawk tak a ni.

First half-ah Ramhlun North FC chungnung zawkin goal thunna hun tha pawh an nei nual a, Lalrinfela leh Rosangliana chuan an chance neih an hmang tangkai lo, Liansanga (Notea) chuan keeper Muanawma chiah a hmachhawn hnuah Muanawma'n a dan sak a, Lalramzauva chuan a hun tha a hmang tangkai thei lo bawk.

Second hlaf tan tirah Ramhlun North FC hian bul an tan tha hle, si hnih faia hma an hruai hnuah an insut tir leh a, hei erawh an ui khawp ang le. Chanmari FC coach Thlanga chuan striker Gani Ahammed Nigam la chhukin MC Malsawmzuala (Mca) dah lut a, danglamna a rawn thlen chiang hle a, Ramhlun North FC goalkeeper kha chesual lo selang chuan hnehna chang thei tur an ni a, an ui vawng vawng dawn ta a ni.

November ni 16, Ningani zan dar 7:30-ah Chanmari FC hian Dinthar an hmachhawn ang a, November ni 17, Zirtawp zan dar 7:30-ah Ramhlun North FC hian Aizawl FC an hmachawn ang.

Copyright © inkhel.com 2024. All rights reserved.