Mizoram Premier League season 6 Round 12-na chu November ni 1 khan AR Lammualah khelh a ni a, hemi ni hian Round match zawng zawng khelh zawh vek a ni. Hmahruaitu Chhinga Veng FC leh Ramhlun North FC te chu 1-1 in an inhnehtawk.
He match-a goal lutte hi second half-a lut an ni a, Chhinga Veng FC tan Lalrammuanpuia chuan second half tirah goal khungin, he goal hi hun tawp dawn added time-ah Lalliansanga chuan Ramhlun North FC tan a rul.
Team hnihte hi Round 6-ah khan an inhmachhawn a, 3-3 in an inhneh tawk a, an intawn vawi hnihnaah pawh chungnung zawk awmloin an inhnehtawk leh ta a ni.
Chhinga Veng FC 1-1 Ramhlun North FC
(Lalrammuanpuia 55') (Lalliansanga 90+2')
Chhinga Veng FC hian coach Lalsangzuala hnuaiah hneh loh nei lo a match sawm an khelh hnuah Aizawl FC lakah an tlawm, Ramhlun North FC an draw chhunzawm bawk. Hetih lai hian Chhinga Veng FC hi League hmahruaitu an ni a, semi final atan an inbuatsaih tan tawh ni pawhin a lang. Point 27 an nei tawh a, hmahruaitu an ni chhunzawm zel.
Ramhlun North FC hian Samson Ramengmawia hnuaiah vawi li hnehna chang tawhin vawi thum draw an nei tawh a, vawi nga an tlawm tawh thung. An foreign player pahnih te chu an visa a tawp tawh avangin an chhawr thei ta lova, hetih lai hian Culcutta Customs Club atangin John Kweku Ampong an la lut thung. Tun season MPL-ah Ramhlun North FC hian point 15 an nei mek, top 4-a awm turin chance an la nei zel e.
Ramhlun North FC hian chance an nei hmasa zawk a,Rosangliana leh Culcutta Customs Club atanga an lak John Kweku Ampong chuan goal khungna chance tha tak nei mahse an hun tha an bawhpelh. Chhinga Veng FC tan Vanlallawma pawhin first half-ah chance tha tak a hlah bawk.
Chhinga Veng FC-in second half bul an tan tha a, Malsawmfela hmangin chance an nei, a shot tha zet chu Ramhlun North FC goalkeeper Sangpuia chuan a lo dan zak hlauh. Chhinga Veng FC chuan nawr chhunzawmin 55 mins-ah mual dinglam atanga Laldinliana ball pek tha zet chu box chhunga lo awm Lalrammuanpuia (Apuia)chuan chiang zet a pet goal a, si khat faiin Chhinga Veng FC chuan hma an hruai.
Chhinga Veng FC hian goal hnihna an khung teuh hle a, Hmingthanmawia shot chu a goal teuh hle, Ramhlun North FC goal ban a per dawp. Dawngtea pet pawh Sangpuia chuan a dan sak leh bawk.
Ramhlun North FC chuan substitution awmze nei an siam, Lalremruata, Lalramzauva leh Jesse-a te lutin, hun tawp dawnah an siphurh an rul ta nge nge. 90+2 mins-ah Liberian defender Korhena thawhrah sengin Lalliansanga chuan an siphurh a rul a, 1-1 in an inhnehtawk ta a ni.
November ni 9, Ningani tlai dar 3:00-ah Ramhlun North FC hian Chanmari FC an hmachhawn leh ang a, chumi zan dar 7:30-ah Chhinga Veng FC hian Bethlehem Vengthlang FC an hmachhawn ang.
Reporter : PC Lala