Novak Djokovic chuan Qatar Open 2017 final-ah Sir Andy Murray hnehin a champion a, 2017 kum bul tha takin a tan a, Australian Open atana inbuatsaihna tha tak Novak hian a hmang bawk a ni.

World No.1 Andy Murray hi ATP Tour match-ah vawi 28 zet a chak zawn tawh a, nizanah erawh a chak tluang lai tih tawpin a awm ta. Sir Murray hi World ranking-ah a dinhmun ngai la luah tho in a hneh loh hi World No.2 Novak Djokovic a ni.

Qatar Open 2017 final hi darkar thum zet khelh a nih hnuah 6-3 5-7 6-4 set la in Djokovic hian hnehna a chang.

Djokovic chuan EuroSport hrilhin,”Kum bul tan nan chuan hei baka duhawm hi a awm chuang lovang. World No.1 hneh hi a thil ropui tak a ni.

“A tir atanga a tawp thleng khan darkar thum chhung kan khel a, kha tianga hun kan duh rei kha a mak lo, Ka hmachhawn hi Andy a ni tlat. A hahthlak em em a, inkhel hautak tak zawng a ni. Hahdam tur chuan hun thahnem tak kan mamawh ve ve ang ka ring.

“Helai hmuna chak a, Andy Murray hneh bawk hi ka tan chuan bul tanna duhthusam a ni,”a ti. Djokovic leh Murray-te hian Australian Open 2017 khel turin Melbourne an pan leh ang.