2018 chhunga MotoGP intlansiak hmasa berah Ducati rider Andrea Dovizioso chu champion lai Marc Marquez aiin a tlan chak hret a, pakhatna a ni.

Qatar Grand Prix-ah hian Tech3 Yamaha rider Johann Zarco chu tlan hmasa ber a ni a, an tlan tirh atangin bike 10 vel chu a hma lamah an inzui fal nghal a.

Lap 18 an tlan chiahin Dovizioso leh Marquez te chuan hmahruaitu Zarco chu an lehpel tan a, an pahnih hian an inum fal zui a. 2017 ah pawh lo inel deuh ber tawhte pahnih hi thleng hmasa zawk tur hriat hleih theih loh khawpin an inum a ni.

Lap 22 na a ni a, a kawi hnuhnung berah Marquez chuan Andrea hi lehpelh tumin a bei a, mahse Dovizioso chuan a lo dang thei hlauh a, Marc Marquez aiin second 0.027 in a thleng hmasa hram a, MotoGP khawvela a vawi 9-na atan a chak ber a ni.

Anni pahnih hnung lawkah hian Valentino Rossi chu a rawn thleng ve leh a. Rossi pawh hian Dovizioso leh Marquez te ang bawkin a hmaa hmahruaitu Zarco chu lap 18-naah a rawn lehpel ve bawk a. Mahse, a hmasa pahnih te hi a um pha ta lo a ni.

LCR Honda rider Cal Crutchlow chu palina niin, a hnungah hian Pramac Ducati rider Danilo Petrucci a awm bawk a. A tira hmahruaitu Zarco chu pariatnaah a thleng thei hram a, a hmaah hian Maverick Vinales leh Dani Pedrosa te an thleng.

Nikum lama Qatar GP-a chak ber Vinales hi a beisei angin a che fuh lo laklawh a. Suzuki rider Andrea Iannone chu pakuana niin a team-mate Alex Rins chu lap 12 ah a tluk avangin a chawl ta daih a ni.

Jorge Lorenzo pawh a brake that loh vangin a chesual a, lap 12 naah tho a chawl a. Pramac Ducati rider pakhat Jack Miller chu 10 na a ni a, a hnungah hian Avintia Ducati rider Tito Rabat leh Marc VDS Honda rider, mithar Franco Morbidelli te an awm.