​PSG hian Neymar chiah alawm lak an tum - Wenger

24th July 2017, 05:07PM

French club hausa Paris Saint-Germain chuan Neymar lak an tum tih chu a chiang, Sanchez pawh lak tumin an dawr mek niin media te chuan an tarlang a, thekhat phei chuan Sanchez leh PSG hi personal terms chungchangah an inrem tawh nitein an sawi hial.

Arsenal boss Arsene Wenger chuan PSG-in Sanchez lak an tum nia report chungchang chu thu dik a nih loh thu leh an hnena a cham chhunzawm tur thu a sawi.

Sanchez hian kum khat chauh Emirates Stadium-ah contract a nei tawh, season liamta khan Arsenal chuan contract thar zawrh leh mahse an hlawhchham, Sanchez hian kar khat chhungin £400,000 hlawh a phut nia sawi mek a ni.

PSG chuan Neymar-a release-clause £196m pek an inhuam, Neymar-a chhuah duh leh duh lovah thui tak a innghat mek, hetiang transfer chanchin leng vel karah Wenger a tawngchhuak.

"PSG hian Sanchez an lak ka ring lo, an lak theih loh vangin Neymar lamah an tuan ta zawk alawm.

"Ni hnih khat liamta khan L’Equipe ka chhiar, Sanchez an lak theih loh avangin Neymar lak an tum zawk a nih kha. Chanchinbute hian chhuah tur an duh vangin hetiang hian an sawi kual vel mai mai alawm.

"Ka ngaihdan ka siam fel tawh alawm, Sanchez hi hralh kan tum lo." tiin Wenger chuan a sawi.

An player te chhuah an phal loh thu an sawi an sawi hi chuan indawrna thui tak a lo kal tawh a ni thin. PSG hian Sanchez-a manah £70m an thehchhuah chuan Arsenal tan hian hnar chu a har ve khawp ang le.

Hetih lai hian Arsene Wenger hian Sanchez hi chelh hram a duh dawn tih hi chu a chiang thawkhatin a lang, results an neih that loh avangin Wenger chu season tawp rual khan ban a ni teuh hle, hetih lai hian Arsenal board te chuan a contract an pawhsei sak leh a, tun season lo awm turah hi chuan trophy lian a hlawhchhuahpui ngei chu a ngai dawn chiang.

Chuti a nih loh chuan Arsenal fans lungawi lo hi hotuten an thlem lungawi zo tawh dawn lo, chumi chu a chian avangin Wenger hian nakuma Sanchez free agent ni mai tur pawh pawi a ti dawn lo tih hi thil chiang tak a ni.

Copyright © inkhel.com 2024. All rights reserved.